Curél

豐盈泡沫潔面乳

我最近皮膚出現咗問題，突然之間皮膚敏感，唔知咩原因搽咩都會敏感，就算係以前用開嘅化妝品或者護膚品都會敏感，所以最近開始要將所有護膚品同清潔用品都轉做敏感肌適用嘅。

CUREL呢隻敏感肌牌子係日本嘅，主打徹底潔淨汗水同油脂污垢，蘊含溫和潔淨成分，無香料、無色素、無酒精，唔會對肌膚造成負擔。

佢本身已經係泡沫嚟，用法係擠壓2次，我亦都冇特登再搓揉佢，洗完亦唔會話乾。官方話會提升肌膚自我防禦能力，希望可以救得返我個皮膚😭

雖然上網建議皮膚敏感最好用清水洗面，所以我而家都唔係每日用洗面乳去洗面，但係有時又覺得塊面多油，所以又會想用返洗面乳。依家用新買呢一隻都冇敏感，亦相信唔會對皮膚有好大負擔，所以都算可以放心使用。同埋重點係佢性價比都算高、以抗敏品牌嚟講價錢亦唔會話特別貴。