ANNA SUI

紫境魔鑰女性淡香水

個個朋友都知我鍾意儲Anna Sui嘅香水Miniature,佢曆年嚟出嘅所有香水，我都有儲住，會托朋友/幫襯代購買齊佢所有嘅Miniature，好光榮地講我係一個專業嘅Anna Sui香水Miniature收藏家。


咁多支香水入面一定有偏愛，而呢一支Anna Sui Forbidden Affair就係我最唔鍾意嗰支，唔鍾意嘅程度係我當年會拎嚟當空氣清新劑用，當有人喺我公司食完螺絲粉等重味食物時，我一定會用嚟辟味。



點解咁唔鍾意佢？因為佢全程只有浸黑加侖子味 甜味出到味，其他聲稱果花味失晒蹤，毫無變化可言，個味太甜，好似成個人跌咗入個糖漿煲。

不過佢個樽同個名係幾好，幾令人有幻想空間嘅。

總結，太甜，香味冇變化，得個樣同名真係唔推薦，好彩Anna Sui開發部同我應該都差唔多sense，冇再出呢支嘅變奏版，如果唔係我又要夾硬支貨版嘅變奏版（因為近年Anna Sui啲限量版只會出貨裝，唔出Miniature Size ）加個原版嘅Miniature樽用晒佢，我真係會跪咗喺度，今次特登出篇文去講我有幾唔鍾意呢支香水，我都覺得自己好癲，不過真係要講返感受同許一許願 祈求佢千祈唔好再出呢類型嘅香水。