fresh

紅茶瞬間修護面膜(已停產)

呢款面膜喺今年5月出咗新版本，但屋企嘅存貨仲未用完XD，都分享一下用後感，當作參考。

我自己比較鐘意塗抹式面膜多過片狀面膜，因為就算每個人嘅面形、大小唔同，塗抹式面膜都可以完全覆蓋到。fresh嘅產品，香味好似真係食得嘅咁……XD，呢款面膜有清香嘅茶味，質地好似雪葩咁，有少少沙沙哋嘅感覺。

佢作為急救用面膜，效果非常好，搽上面敷5-10分鐘，清水洗淨就可以。敷上面有清涼感，洗完面之後清涼感仲會維持多一陣，所以夏天使用，感覺非常舒服。敷完之後會發現皮膚細緻咗、水潤咗，毛孔變得冇咁明顯，所以敷完之後上妝都會貼服咗。

夏天如果長期處於冷氣房，皮膚好易缺水乾燥。呢款面膜可以瞬間保濕、修護皮膚，敷上面又有涼爽嘅感覺，幫個人降降温，推薦大家入手作為夏天保養品。