Melano CC

藥用黑斑集中保養美容液

自從疫情開始就一直戴口罩，偶爾悶出暗瘡，有時仲會留低啲暗瘡印。開始搵適合嘅去暗瘡印精華，買咗幾款之後都係覺得樂敦Melano CC純天然檸檬祛斑精華液最溫和，效果亦係最明顯。喺日本嘅人氣超高，如果有留意開日本護膚博主嘅應該都見過呢隻產品。

升級版精華含有活性型維他命C同維他命B6，可以有效提亮暗沉膚色，調理皮膚分泌同維持肌膚油水平衡。另外亦加咗三重維他命C誘導體：維他命C衍生物、維他命C醣苷同脂溶性維他命C。

我自己連續用咗差唔多一年，暗瘡印淡咗好多；真心推介俾大家。一支大概可以用到四個月左右，價錢又親民。全銀色係舊版，有黃色嘅係升級版（濃密+控油款）。個人推薦升級版，去暗瘡印快咗少少～

使用方法：
乾性皮膚可以全塊面用，油性皮膚就局部用（畢竟係油狀液體）。產品可以早晚使用，如果朝早用的話要做好防曬。我自己就係臨睡前洗面後用4至5滴，輕輕喺手心搓勻再搽上全塊面，等吸收之後再搽保濕霜。如果覺得質地太油，可以同面霜混合之後先搽上塊面，膚感超正！