The Body Shop

茶樹油

The Body Shop 茶樹油用後感


之前生暗瘡生到好煩，又紅又痛，聽人講茶樹油消炎好得，見到The Body Shop呢支咁出名，又話係明星產品，咪買支細裝嚟試下囉！

支油係透明嘅，質地好輕身，唔會立痴痴。一打開陣味真係好「攻鼻」㗎！係好濃烈嘅茶樹味，聞落好清爽，有種「消毒緊」嘅感覺。


我唔會全面搽㗎，只係用 「點塗法」 。每次洗完面，用棉花棒蘸少少，直接搽喺啲剛出或者已經出緊嘅暗瘡上面。如果係好大粒又痛嘅瘡，我會夜晚臨睡前搽厚少少，等佢慢慢發揮功效。

用後感覺：
· 消炎快！ 對於啲剛剛開始紅同痛嘅暗瘡，真係好有效。好多時搽咗一兩晚，就冇咁紅同冇咁痛，唔會繼續發大落去。
· 催熟暗瘡：如果粒瘡係有膿嘅，佢好似會幫手催熟佢，等啲膿快啲出嚟，之後就好得快啲。
· 感覺乾淨：搽上臉嗰陣有陣涼浸浸嘅感覺，好似幫你殺緊菌咁，個心都定啲。

缺點？
· 好乾！ 真係好乾！如果搽得多，或者附近嘅皮膚都會乾到甩皮，所以千祈唔好全面用，同埋一定要做好保濕。
· 對大膿瘡或者石頭瘡效果慢：如果係好深層、好大粒又冇頭嘅石頭瘡，單靠佢一支就好難搞，要配合其他產品先得。
· 氣味唔係個個都鍾意，真係好似消毒藥水味。