YSL BEAUTÉ

修復亮眼精華

前排參加活動得到呢支YSL亮眼精華試用裝，雖然係細細包1ml，但諗住去旅行嗰陣試吓啦，貪佢細支方便帶嘛。我本身都留意咗呢個品牌嘅護膚品好耐，始終係專櫃嘢，價錢唔平，所以一直冇入手。今次試下係咪真係咁神奇。

一拆開嘅時候，見到質地係白色乳液嘅狀態。佢話係蘊含80%水分 搽上手背試，真係好似佢宣傳咁講。似精華又似乳霜。搽上眼周個下，感覺好得意，唔係普通眼霜嗰種厚重，又唔係稀到好似水咁冇存在感。隔一陣就吸收，唔會好黏笠感，亦都冇出現過擦膠碎。用咗差唔多4日（早晚用），1ml居然都幾襟用，每次好少就夠搽兩隻眼。

保濕同持久度：
我雙眼主要嘅問題就係黑眼圈比較深，早排發現有眼紋，化完妝就更加明顯。我試嘅時候係秋天，喺乾燥嘅機艙同酒店房入面用，眼周都keep到水潤，冇繃緊。官方話24小時保濕，朝早搽完，到夜晚眼周都仍然係軟滑嘅，冇乾紋爆現。不過就黑眼圈就冇乜改善。


秋冬用質地係幾舒服嘅，不過如果你係油性皮膚，呢支精華夏天用可能會覺得有少少潤，留返秋冬用應該會更加舒服同適合。