ADDICTION

防曬護膚調色氣墊

首先要感謝@cosme之前嘅會員禮活動送出呢款ADDICTION 防曬護膚調色氣墊，亦係我第一次接觸呢個品牌。用到見底之後覺得真係幾好用，去日本旅行嘅時候就買返個補充裝。喺香港呢個品牌嘅產品好似唔常見，但原來喺東京各大百貨公司都好容易見到ADDICTION嘅專櫃。

平時見調色霜通常都係支裝液體，好少見係氣墊裝。用氣墊嘅好處就係上妝比較均勻，冇咁容易厚薄不均。我用嘅色號係002 Rosy Lavender 粉紫色，佢可以修正膚色，令面色望落亮白啲，個人都精神咗。防曬系數係SPF45 PA+++，足夠應付一般日常使用。防曬產品有時上面後感覺會比較乾，但呢款產品有足夠嘅滋潤度，上面之後唔會覺得乾，後續上妝都冇出現過乾紋、卡粉情況。睇返產品介紹原來添加咗90%美容液成分，尤其注重喺保濕方面，唔怪得感覺好滋潤。

整體嚟講，產品喺防曬、護膚同調色呢三方面出嚟嘅效果感覺非常滿意，值得推介。