CANMAKE TOKYO

淚袋眼影

講到開架好物，canmake嘅淚袋眼影盤01號色一定有份。一度喺sns好hit之後引起香港日本都大缺貨，我買嗰陣都搵咗一段時間。要強調返好用嘅係01號色，我另外買咗05號色，就真係唔係咁好用，下面會講原因。細細盒，內附海綿頭同掃頭嘅專用掃，帶出街用都方便，不過我習慣用返自己嘅眼影掃。
一盒有四格色：微微反光嘅米色、米色珠光、金色半透明閃粉、啞光輪廓陰影，原意係可以一盒做到淚袋嘅突出光面同畫下陰影線。畫喺手上就係咁嘅色。以佢本身嘅用途黎評論，冇錯係可以畫到一個有凹凸感嘅淚袋，佢係一件合格嘅產品，但其實如果你手上有其他類似顏色嘅眼影一樣做得到。
粉質黎講其實冇特別好，尤其佢格閃粉，一定要用海棉棒上啲閃粉先會密，同埋上眼之後啲閃粉會甩返落嚟，所以我好少用呢格。至於陰影色好睇你本身膚色夾唔夾，01色嘅陰影色偏橙，喺我膚色上係做唔到自然嘅淚袋陰影，但用嚟加深眼尾係幾靚嘅。至於我買05色，粉質基本上差唔多，只係變成淺紫色基調，我依家都係當普通眼影用。

咁點解我仲會話佢係開架好物呢？係因為佢左邊格微微反光嘅米色係淚溝神器！

✅提亮淚溝一流
近年大家興講啞光高光提高面部平整度，好多品牌都開始出好多淺色啞光嘅粉狀產品，而本身有黑眼圈同淚溝嘅我當然買咗林林種種呢啲淚溝神器。
試過咁多種暫時未搵到一種遮得好過canmake呢盒，可能因為佢米色得黎微微反光，唔會令到淚溝顯灰又加強提亮。我嘅習慣係用遮瑕膏遮完黑眼圈再定好妝，之後用柔軟嘅細掃將左邊嗰格搽喺淚溝最深嘅位置輕輕blend鬆，之後你就會見到淚溝平咗好多，法令紋都可以咁做。

我係會願意為咗呢一格米色而無限回購嘅，當然如果canmake可以出一盒單色眼影係呢隻色嘅話，我會更加開心。