shu uemura 植村秀

ultime8 琥珀山茶花養膚潔顏油

感謝@cosme之前送出嘅會員禮，收到呢支想試好耐嘅植村秀ultime8 琥珀山茶花潔顏油。

首先評價吓佢卸妝方面嘅表現，佢有種好好聞嘅山茶花香味，令卸妝變成一種療癒過程！XD 種用法簡單，乾手乾面時使用，我個人就用兩泵左右份量，搽上面輕輕打圈，跟住加少少水乳化，基本上唔需點用力捽，無論粉底、眼影、甚至比較防水防汗嘅眼線、睫毛液，都輕鬆融解卸走，無需擔心卸妝過程成日拉扯皮膚而加速皮膚老化。之後用清水清淨就可以，亦無需再使用潔面產品再洗一次面，卸妝、潔面一步到位，非常方便！即使秋冬期間使用，完成卸妝後都唔會有繃緊嘅感覺！

可能大家對佢嘅第一印象，就係卸妝油，而忘記咗佢亦都適用喺晨早潔面時使用。由於佢係油性質地，喺面上打圈嘅時候可以輕鬆地帶走夜晚瞓覺時所產生嘅油脂分泌及堆積嘅老化角質。洗完面有一種潔淨感，同時皮膚亦唔會有乾燥、繃緊嘅感覺。連續使用一排，會感覺毛孔細緻咗，亦比以往更有彈性同透亮，呢個係佢有效清潔毛孔入面嘅油脂同去角質嘅證明。

或者有人會擔心用油性產品潔面，會唔會容易造成油脂粒，本人係混合性油肌，使用期間並無出現油脂粒或者因潔面產品唔合適而導致有暗瘡情況。

總括嚟講，呢款潔顏油無論喺卸妝定係潔面方面嘅表現都令人非常滿意，用過就會明白，點解佢可以長期喺@cosme排行榜入面名列前茅！誠意推薦大家試用！