YSL BEAUTÉ

升級版夜間修復精華 (捱夜急救精華)

YSL夜皇后精華 用後感

老實講，當初買呢支精華，一半係俾佢個包裝呃咗，一半係見啲人講到佢好神。用咗差唔多兩個月，而家同大家講下真實感受。

質地似水定似油？

佢係雙層設計，用前要搖勻，倒出嚟係水狀但帶少少油感，搽上面好快吸收，唔會話成塊面油淋淋。個人幾鍾意呢種質地，特別係夏天用，唔會有負擔。

最明顯嘅效果——去暗粒同膚色均勻

我本身下巴同額頭成日有啲細細粒嘅閉口，摸落去鞋鞋哋嗰種。用咗大約一個星期，啲暗粒開始平滑咗，肉眼見到少咗。用到一個月度，成塊面望落乾淨咗，冇咁黃，膚色均勻咗少少。呢點係我最滿意嘅位。

去痘印？有啲料到

手多擠暗瘡之後留低嘅啡色印，用佢期間褪得快過平時。當然唔係話一晚消失，但係明顯見到淡得快咗，化妝都唔使特登用遮瑕膏狂cover。

要留意嘅位

佢入面有果酸成份，所以敏感肌要試清楚先。我自己唔算好敏感，但頭幾次用嗰陣，塊面有少少刺刺地嘅感覺，尤其係如果之前做過深層清潔或者去角質，嗰晚用會更加明顯。後來我學識咗，用完佢之後一定敷返個保濕面膜或者搽厚少少面霜，就冇再出現呢個問題。

另外就係，日頭唔好用！說明書都有寫，呢支只適合夜晚用，日頭用驚會反黑。

有冇缺點？

有，佢個滴管設計好難控制份量，成日一吸就吸太多，滴落嚟又會周圍飛濺，要用得好小心先唔會嘥。同埋價錢都幾貴，雖然有效果，但回購嗰下真係會諗一諗。

總結

如果你本身有暗粒困擾、膚色偏暗啞，同埋皮膚夠「硬淨」唔係好敏感，呢支夜皇后精華值得試。佢效果唔係誇張到「一晚變面」，但係持之以恆用，你會見到塊面乾淨咗、平滑咗。

但如果你係敏感底，或者平時好少用酸類護膚品，建議先試sample，唔好一次過衝正裝，畢竟都唔平啊 😂