M.A.C

專業無瑕霧鏡氣墊粉底

膚質係混合性偏油，T字位出油但係面頰易乾，容易浮粉。

✨ 遮瑕度
之前用過氣墊粉底，俾我既感覺係遮瑕力一般，但呢盒MAC霧鏡小黑盒遮瑕力絕對滿意。本身面頰有色斑同膚色不均，平時用開輕薄型粉底遮唔到。但呢盒只需薄薄印一層，已經有明顯均勻膚色同掩蓋色斑既效果。

💧 質地
上面既感覺幾清爽，就算貪心想加強遮瑕度，厚搽一層都依然保持輕透感，唔會覺得黐笠笠或者焗住塊面。不過佢嘅顏色係偏白同埋粉感會相對明顯，適合鍾意完美妝容、追求白晳無瑕感既人。

⏳ 持妝效果
控油效果唔錯，用左半日後塊面都依然冇變灰黃，亦冇咩脫妝既情況，keep到乾淨既感覺。有輕微卡粉問題，用後表情紋會變得明顯。

🧴 設計細節
粉撲質感好柔軟，接觸皮膚既感覺舒服。最貼心既係粉撲形狀帶有一個角位，化鼻翼兩側、眼頭呢啲微細位置嘅時候非常就手。帶出街補妝亦唔錯，氣墊粉底比液態粉底液方便得多，自帶鏡又細細盒。

整體嚟講，呢款小黑盒雖然表情紋方面要留意，但以遮瑕度同持妝能力嚟講值得推薦。