M.A.C

專業無瑕霧鏡氣墊粉底

最近有cosme 試用 試咗 M.A.C 呢款無暇霧鏡氣墊粉底（色號 N18）。

【質地】
拍上塊面感覺幾輕薄，唔會覺得好厚重或者有層油焗住皮膚。佢係霧面妝感，上完後塊面乾爽得嚟，唔會話乾到扯住。N18 呢個色號對我嚟講還ok，可能偏 暗咗少少 。

【效果/缺點】
遮瑕力方面，大約做到 6 至 7 成。一般嘅泛紅同埋淡啲嘅暗瘡印基本上都遮得七七八八，不過深色嘅新暗瘡印或者立體嘅石頭瘡，就一定要另外用遮瑕膏幫手。

控油力算不過不失。以我呢種混油肌嚟講，朝早出門去到下晝 4、5 點左右，T 字位開始有啲油光，但冇出現溶妝或者浮粉。不過如果當日皮膚狀態差、有啲暗瘡謝緊脫皮嘅話，佢會稍微有啲顯乾紋同埋卡粉，所以保濕一定要做好。

【總結】
整體嚟講呢款氣墊嘅妝效幾靚，霧面感令到毛孔望落細緻咗，而且用咗一排冇引致新嘅暗瘡或者大爆發。雖然唔算係完美無瑕但作為日常返工想快靚正出門口嘅底妝，依然係一個穩陣嘅選擇。我係鍾意今次呢個product 嘅:>