CeraVe

去油抗瑕疵白泥潔膚露

試用程度：因順豐延誤遲了收貨，只試用咗九日，每晚使用。
橫跨了一個颱風，時正炎熱潮濕之季。
有與收到Cerave同系列「A醇全效平滑祛印精華」及「多重酸抗瑕疵修護精華」一起試用。
以往有用開Cerave的修復霜於濕疹皮膚上，自從佢被L'Oreal收購後就冇乜點再留意呢個品牌。

容器：●●●●●●○
膠樽泵裝，扭泵位可鎖起/打開，扣位亦貼合泵咀，雖然有點大樽，但設計上對於出門攜帶使用幾方便。

一泵夠洗全臉+耳背+頸。
雖然外型較扁薄，但可能因為新使用有足夠重量，未至於容易推跌。

氣味及質地：●●●●●●●
頗稀嘅透明gel狀，一泵夠洗全臉。
無香料，只有輕微原料味。
起泡後柔軟薄身，與皮膚接觸時會有滑滑嘅手感（類似中菜芡汁）。成分：●●●●●○○
見宣傳上寫咗幾大有效成分：2%水楊酸、白泥、Ceramide及B3。
雖然Cerave出名於專利嘅Ceramide配方，但個人認為洗臉用品只會喺臉上停留短暫時間，所以大膽推斷成分當中嘅ceramide及B3，甚至排頭幾位嘅甘油，都只係提供一個保護臉部水分不被抽乾嘅作用；水楊酸係好多暗瘡護膚品入面嘅主要成分，2%已經係好多國家規定嘅上限。但基於同樣理由，我會當佢係清潔臉部油脂嘅功能較多。

見到成分表中有幾項防腐劑，不過同上述理由，洗個臉頂盡幾分鐘嘅事，皮膚真係吸收到嘅量只係超微量，自己覺得尚算合理。

想提及一下中文宣傳中所述嘅「白泥」，查閱成分表後估計係"Hectorite"：膨潤土嘅主要成分。排配方表尾5，白話解釋即係超少（2%嘅水楊酸喺配方表排第5，total 31個原料）。咁都掛個名喺產品名稱上，有種吹水吹大咗嘅不良感受...

因為都有用過Cerave另一款水楊酸洗臉，對照番成分其實唔係淨係舊formula加Hectorite就當新產品推出，難以理解點解會用「白泥」落名同宣傳，睇番外國官網都冇咁樣介紹過，只係寫”Gentle Blemish Control”，更加不明白亞洲team做緊咩。

附上台灣Cerave官網嘅兩款洗臉對比不過產品本身嘅配方我覺得已經不錯，所以仍然會有5/7分。

效果：●●●●●●○
不論用手洗或搭配洗臉機均容易起泡，亦容易沖洗，無殘留感覺，洗後臉係剛好乾淨又冇被扯走水分嘅感覺。
洗感良好，洗臉後皮膚乾淨又柔軟水潤，已經合格有多。
平時出門會有透明防曬同碎粉，偶有幾日會上不防水的輕量化妝品eg. 調色base/highlight/contour，搭配洗臉機使用都洗得一乾二淨。

結論及建議：●●●●●●○
除咗好在意要0防腐劑嘅人之外，推薦不論膚質/男女/年齡都可以試下。
本身一個洗臉用品洗得乾淨又冇令到臉過乾就已經足夠好，「洗落舒服」同「洗完舒服」嘅洗臉用品市面上大把，但兩者都有就另一回事。睇番市售價錢，咁大樽應該夠用一季，個人覺得值得購入。
試用期太短未遇上皮膚過敏嘅日子，所以呢一方面無法作評價。

中文名同宣傳上有誤導之嫌，咁多有效成分居然拎「白泥」嚟sell有點令我反感，不過對於件產品本身我係中意的。
再次建議大家不要因見到宣傳所述就以為洗個臉會有護膚效果。