MENTHOLATUM 曼秀雷敦

LIP PURE OIL 天然植物精華油潤唇膏(無香料)

試用程度：收到無香料款同蜂蜜味，各用咗四日共八日，隨身攜帶覺得唇乾時就搽，夜晚臨瞓前會再搽多幾層。已入秋天氣逐漸轉乾燥，但仍然炎熱。

容器：●●●●○○○
外形簡潔，蓋位做咗漸六角形同有隻立體蜜蜂，幾有特色又冇咁易碌走（不過大力d都係會碌走）；蓋身夠長唔會擺喺袋撞甩蓋，但用落初期會覺得卡扣位太實，開同閂都要比attention佢，不能無腦使用；轉潤唇膏結構順𣈱，唔會轉到最盡後番唔到轉頭。
氣味及質地：●●●●●●○
無香味 - 款式只有很淡蜂蠟原料味，唔湊近聞都唔會留意到，十分適合喜歡無香料嘅用家 ；
蜂蜜味 - 產品介紹指無人工香料，聞落都好似真正蜂蜜咁，有種先酸後甜近乎發酵味嘅層次感，應該冇咩人會討厭呢隻味👍 搽上咀後仍會聞到少許味道。
兩款膏體都硬，炎熱天氣下都冇出現溶化變形/漏油等情況；搽上唇係薄薄地嘅油潤感，反覆大力搽幾層都唔會係凡士林嗰種厚敷感覺。

成分：●●●●○○○
兩款都搵唔到full ingredient list, 但產品介紹話係100%食品級成分，含4種蜂蜜萃取物：蜂蠟、蜂皇漿、麥盧卡蜂蜜同蜂膠，如果當中屬實同含量足夠嘅話，係會幾有消炎修復嘅功效，但始終無成分表無從判斷，所以保守評分。
另外注意到兩款個名有少少分別：蜂蜜味叫LIP PURE 天然植物潤唇膏，無香味叫LIP PURE OIL 天然植物精華油潤唇膏，直接估計無香料款多咗個植物精華油😂

效果：●●●●●●●（無香料）●●○○○○○（蜂蜜）
無香味完勝，本身覺得佢body咁薄臨瞓搽唔會捱得住冷氣房同一晚嘅時間，但第朝起身仍然有保水滋潤嘅感覺！
蜂蜜味夏天日間用都唔夠做，搽完當下只係覺得有層嘢，但咀唇仍然乾燥，搽到第三日發現咀唇開始會乾到痛，但搽得更密仍然無法改善，到第四日咀唇開始有想裂嘅跡象，即時轉番無香料款，半日就解救了。
兩者於一共試用八日之內都冇出現潤唇膏常見嘅積白線嘅問題，值得稱讚。

結論及建議：●●●●●●○
無香味 - 除咗追求厚敷感覺嘅用家之外，大部分人都適合全日隨便使用。未知進入冬季後氣候更乾燥時佢表現如何，但目前幾有信心。
蜂蜜味 - 除非好迷戀原始蜂蜜味道需要全日聞住，如果唔係可以唔洗考慮，或者可以試下搵蜂蜜味香水都好過搽一支阻止唔到你咀唇變乾嘅潤唇膏。
溫馨提示：記得注意有冇閂實個蓋🙈