Sulwhasoo 雪花秀

禦時緊顏參養面霜（人參面霜）

今次試用嘅係雪花秀禦時緊顏參養面霜，平時比較少捨得用咁貴嘅面霜，所以一開始都只係覺得試下新產品。不過實際用咗一段時間之後，覺得佢真係幾有驚喜，尤其係對我呢種偏乾肌嚟講，保濕同滋潤度都好足夠。
面霜嘅質地柔潤，但又唔會厚到推唔開。每次用少少已經可以搽勻成塊面，推開時好順滑，吸收之後唔會覺得表面好黏。通常我會喺夜晚使用，搽完之後覺得皮膚好似有一層滋潤嘅保護膜，第二朝起身摸落仍然係柔軟嘅，唔會有乾繃或者粗糙嘅感覺。
我面上本身有色斑，膚色有時亦會比較暗沉，加上乾肌關係，細紋同乾紋會容易顯現。用咗一段時間後，覺得皮膚飽滿咗，乾紋冇之前咁明顯，面頰摸落亦平滑咗。雖然唔會話用幾日就可以完全改變膚色，但整體膚況真係靚咗，皮膚有返少少光澤，素顏睇落冇咁攰。配合潤燥再生精華一齊用，滋潤感更加明顯，之後上妝都貼服咗，粉底冇咁容易浮粉或者卡喺乾紋位置。
我覺得呢款面霜最適合乾燥天氣、轉季，或者皮膚狀態比較差嗰陣使用。對我嚟講，佢唔只係一款普通保濕面霜，用完之後皮膚係有種柔軟、飽滿同緊緻咗嘅感覺。最令我意外係，平時我唔太願意買咁貴嘅護膚品，但今次試用之後，真係覺得產品效果幾明顯，會令我考慮之後繼續使用。整體而言，面霜嘅滋潤度、保濕力同改善乾燥粗糙嘅效果都令我滿意，對偏乾肌嚟講係一款幾值得試嘅抗老面霜。