shu uemura 植村秀

unlimited 無限輕透持妝粉底液 (小方瓶 2.0)

好開心今次抽中咗@cosme shu uemura「小方瓶2.0」試用邀請❤️

我自己本身都幾鍾意shu uemura嘅產品，不過之前只係買佢嘅定妝蜜粉同定妝噴霧，幾鍾意佢蜜粉輕薄冇閃粉&噴霧嘅香味自然唔刺鼻，但粉底因為有用緊嘅牌子&未用晒，就冇買嚟試，今次順便可以試下！

首先喺包裝上，都沿用過往優點，而我自己一向都係比較鍾意呢種按壓唧嘴+硬玻璃樽身嘅設計嘅，一來靚，二來硬樽身帶去其他地方唔洗驚壓爆（e.g.我成日好驚會壓爆CDP軟管嗰款），三來我自己覺得按壓唧嘴比起泵嘴嗰d衛生&保存冇咗易氧化。

其次喺質地上，呢款粉底水潤得嚟唔會太稀，亦都唔會有好笠嘅感覺，我係滿意嘅。上臉嘅時候都幾容易推開，我自己就冇乜遇到卡粉嘅情況嘅。佢上臉之後唔會有好明顯嘅粉感，但相對嘅，佢嘅遮瑕度當然就冇其他重粉感嘅粉底咁高，而呢樣就需要自己取捨喇。我個人會認為呢款係比較適合唔算太多遮瑕要遮嘅人用，有妝感但又唔會好面具。少瑕疵嘅話薄薄一兩層基本上都夠，如果要高D遮瑕度就要再疊加，但如果係好多瑕疵要遮嘅人就未必咁適合。

另外喺妝感同持久度嚟講，呢款粉底係唔錯嘅。一來我呢段時間每次用嘅時候，全日帶妝，到夜晚嗰陣都唔係太有氧化/暗沉嘅問題出現，呢樣非常重要。二來，我屬於上妝一日會出油嘅人嚟嘅，我亦都冇追求要全日唔出油，呢款帶妝到接近夜晚會開始出油，但個感覺唔會太油，而係有光澤感咁，反而都幾自然。（張相係我持妝一日，去到夜晚嘅妝感）

總括嚟講，shu uemura呢款霧面粉底我會推介俾瑕疵唔算太多，希望粉底輕薄冇面具feel嘅人，我自己有加埋蜜粉用，整冊持久度同滋潤度都幾好。有機會嘅話會想試下「透光小方瓶」，睇下同霧面有咩分別。