OLAY

水感透白光曜精華 (#水光小白瓶)

之前都一直聽過OLAY嘅抗糖美白精華好好用，今次有幸被抽中參與試用活動，終於有機會試到新升級嘅OLAY水光小白瓶。小白瓶嘅包裝係用機械滴管設計，扭開樽蓋滴管就會吸滿一次份量嘅精華，我以前都用過類似設計嘅滴管，覺得呢種設計係幾好用嘅，要控制一滴滴咁擠出嚟都一樣控制到。精華係乳白色嘅，帶有微微香味，比起精華我覺得佢更加似乳液。推開唔會水到流落嚟，但又夠延展性可以好容易搽均成塊面。

✅質感清爽不油膩
搽完佢整體偏清爽唔會笠痴痴，皮膚表面只會留有少少潤嘅感覺，以我混合性偏乾嘅皮膚，喺香港春夏嘅悶熱潮濕天氣黎講，搽完佢再喺眼周乾嘅地方補眼霜都夠。

✅提升水潤光澤感枝精華本身就自帶光澤感，只要一搽開已經可以即時做到個水光效果，但唔會好似化妝品咁捽下佢就會甩，夜晚搽完到朝早訓醒個水光感都依然keep到喺度。我諗有啲人可能介意出去過夜俾人見到素顏嘅樣，佢就可以代替素顏霜，夜晚都可以用一個最佳肌膚狀態見人。

✅妝前使用貼妝不打架
佢本身個水光效果我覺得完全可以取代水光妝前底霜，化妝前搽咗佢個妝好貼又有光澤感，後續搽返防曬同粉底都冇出現打交出擦膠碎嘅情況。

✅改善皮膚暗黃
搽咗一段時間，就算朝早洗走咗表面增光澤感，都可以見到皮膚比以前亮白，未至於話見到白咗個色階，但可能膚色均勻咗，少咗暗黃，所以睇落比以前透白。盡量影返同一個小疤痕位置俾大家對比，可以見到搽完皮膚好似識反光咁，多咗啲飽滿嘅感覺，膚色睇落都有精神咗。

至於小白瓶另外一個細緻毛孔改善粗糙嘅功效，因為我本身毛孔問題唔算嚴重，所以未睇到明顯效果。不過佢提升到皮膚反光嘅效果，相信一定程度有提升到皮膚平滑度。

整體我覺得枝OLAY水光小白瓶性價比好高，每次份量搽多少少都唔會心痛，去黃效果又唔錯，我會繼續用落去，如果搽夠一個月佢真係幫到我膚色變淺嘅話，我應該會無限回購。