Charlotte Tilbury

夢幻柔光粉氣墊

最近不時被Charlotte Tilbury夢幻、可愛、奢華嘅廣告風格吸引到，結果自己都有機會試用了！感謝cosme🤩


CT呢款Pillow Talk夢幻柔光粉氣墊，外型係粉紅色菱格軟皮配玫瑰金色外殼，貫徹品牌夢幻、可愛、奢華嘅風格，拎上手個陣會令人聯想到魔法少女嘅變身器haha！外殼size適中，手掌比較細嘅女仔都可以一手掌握，而入面塊鏡嘅size就有咁大得咁大(完全無border🤣)，拎住化妝好方便！



近排塊面好多暗瘡印，加上開始試用嘅前一日做完M22，面部皮膚整體都呈現泛紅、偏乾嘅狀態。用Pillow Talk氣墊本身嘅水滴型粉撲輕輕按壓濾網兩下，取粉量已經足夠大半塊面使用(利申：本人係闊面人)。


拍上面可以感覺到呢款氣墊粉底質地好柔滑、薄透，薄薄一層已經可以遮蓋八至九成嘅毛孔同泛紅，就算疊加都完全唔會有厚重、面具嘅感覺，妝效非常自然，仲帶有微微嘅光澤感，好似原生嘅肌膚一樣。

平時一直用開粉底液，第一次用氣墊上妝就發現真係快手好多。不過如果有比較深色嘅暗瘡印，就可能要先用校色遮瑕先遮到了。相對之下，粉底液嘅遮瑕度會再高少少。

雖然好鍾意Pillow Talk輕透自然嘅妝感，但發現佢嘅質地唔係太抗摩擦，因為有一次上完底妝後，好似平時咁用火苗掃上碎粉定妝，結果個妝都甩左唔少🫣之後改用粉撲輕拍碎粉上面，先至保持到原有嘅妝效。

上妝4小時後，主要喺有冷氣嘅地方逗留，淨係出過少少汗，妝容仍然貼服完整，皮膚帶有自然、透亮嘅光澤，透薄嘅粉底質感甚至令我一度忘記左自己有化妝😆

後來喺街外逗留左一段長時間，天氣又熱又潮濕搞到爆晒汗，上妝後12小時，塊面就有少少浮粉，不過遮瑕度仍然保持到。整體而言，Pillow Talk氣墊比較適合長時間留喺冷氣房嘅女士使用，如果經常要去室外或者比較大汗嘅女士就可能要更加確實做好定妝了~