Charlotte Tilbury

夢幻柔光粉氣墊

TLDR：埋櫃試色，可以一戰，扔咗原裝粉撲佢，base唔用好過用。

試用程度：連續試用六日，適逢春夏之交，天氣變得炎熱潮濕。期間有一日戶外活動，其餘時間大部分都留在有冷氣的室內空間。

容器：●●●●●●○
超級靚😍！！！雖然只係塑膠鍍金屬色同合成皮，但出到嚟個手感仍然好好摸又好靚。
Cushion直徑大概8cm, 厚度約2.5cm, 唔算十分的骰，如果揹開小廢包嘅可能未必適合帶佢出街。磁吸蓋，普通放喺袋應該未至於會撞得開，但我唔敢搏就咁扔佢入袋所以試唔到。
中間有隔層隔開粉撲，隔層底部亦有d凹凸嘅點點去比你印走多餘嘅粉底。揭開封紙後可睇得出佢嘅網係細緻軟身嘅款式。中間應該冇海綿，所以取粉時好容易因為overall太軟而過量，要自己就一就力同再喺隔層位印一印。另外使用後會容易堆積粉底喺網面（如圖箭咀示）
氣味及質地：●●●●●●○
粉質細滑，冇明顯香味。粉底部分冇得彈👍🏻
薄上拍開後已經可以好似airbrush嘅效果，疊加使用亦唔會卡粉。不過扣分位在於佢個粉撲，太薄又太吸粉底，試咗兩次之後果斷棄咗，換其他氣墊粉撲後妝感大躍進！（圖為使用一次後粉撲吸粉程度）
粉底唔焗皮膚，連續多日長時間帶妝後都冇生暗瘡。

成分：●●●●●●●
始終係化妝品不苛求有幾護膚，只係唔好有太差嘅防腐劑都偷笑。
拎過盒上嘅ingredient list去cosdna檢查過，冇咩有害嘅成份，反而發現佢有加甘油、蠶絲同少量植物萃取等對皮膚有益嘅成分。
相信未至於會好似一般底妝咁會抽乾塊面或者致痘。

效果：●●●●●○○
妝感微潤，薄上會好似自己原生皮膚咁，但更均勻有光澤，配合非啞面碎粉定妝後仍然有種透亮感。
遮瑕度中等，疊加後仍未至於夠遮黑眼圈/色素沉澱。
毛孔遮到八九成，社交距離下睇係完美皮膚。
持妝八小時基本上問題不大，但大概四小時後T zone會現油光需要壓一壓，唔補都未至於好明顯。
有個缺點係佢完全唔防磨擦，如果鼻敏感的話鼻下區域嘅粉底可以say bye bye🤧

試過用唔同嘅base配合，但反而用補濕嘅base同控油嘅base都會令到佢容易浮同甩，反而咩都唔用就咁上係最靚最持妝。

又驚又喜地發現佢冇暗沉問題。極端到試咗擺一整日後都冇變色。因為以前有用過CT嘅粉底，當時覺得化完冇耐已經暗咗差不多兩階嘅色，所以今次拎咗1N色預佢會暗番一兩階。結果佢0暗沉反而太白...最後嘗試過兩者混用個色tone先啱😂呢個cushion色號選擇不多，建議埋櫃試下先。

結論及建議：●●●●●●○
作為一個唔係特別喜歡cushion作為底妝嘅人嚟講，今次好感受到cushion嘅魅力：快速盲用衰極有個譜。
始終香港夏季比較潮濕，底妝好容易話花就花話溶就溶，但今次呢個cushion有種隨便用隨便靚嘅感覺。
除咗個粉撲頗廢之外其他都好評！