CLARINS

Extra-Firming 煥顏緊緻面霜

好榮幸有機會試用 CLARINS Extra-Firming 煥顏緊緻面霜，希望呢篇心得對讀者有用。

50ml 面霜嘅包裝比想像中大，質感厚實墜手，配上玫瑰金色嘅樽，整體感覺奢華。樽蓋高度較矮，比較難用力，須注意用完唔好擰得太實。

包裝由內至外都係可回收嘅設計，內膽可以替換補充裝，值得一讚。

面霜顏色為皮膚色，同個樽嘅顏色好襯，亦好似底霜嘅顏色。香氣係一般專櫃品牌護膚品嘅味，我諗唔到似邊樣植物或食物，總之唔太化學或濃味就算係好。
面霜質地滋潤，容易推開而且唔黏笠。搽匀後感覺透薄，吸收良好，非常舒服。我覺得一年四季都適合使用。
連續早晚使用約一星期，面部肌膚水潤同飽滿咗。產品亮點包括飽滿蘋果肌同時又緊緻 jawline，我本來半信半疑，但試用後發現真係有呢個效果，好驚喜。雖然試用時間短，但皮膚已經有幾明顯嘅改善，輪廓較之前立體，睇落年輕咗同有活力咗，相信持續使用效果會更加明顯。
另外，我本身 jawline 近頸部位置嘅皮膚比較敏感，類似手臂內側肌膚，所以之前試過唔少護膚品同化妝品都導致痕癢。今次為咗試 CLARINS 面霜嘅緊緻效果，我冒險搽落呢個位兼每次都會按摩幾吓，竟然冇敏感！證明佢性質溫和卻不失功效，對我嚟講非常難得，已成為我其中一款人生護膚品。

總括嚟講，CLARINS Extra-Firming 煥顏緊緻面霜製作精良，效果顯著。希望持續使用後，肌膚會進一步變得飽滿同緊緻！