SOFINA Primavista

持久控油防曬調色底霜 SPF50 PA+++ (第3代)

作為一個典型嘅混合肌（T區易出油、兩頰偏乾），又要喺辦公室長歎冷氣、返工放工難免要喺太陽底下暴走嘅香港上班族，我對「防曬 + 底霜」二合一嘅產品要求特別高。今次試用嘅 第3代 Primavista Skin Protect Base UV50 EX ，揀咗 活力紫色 ，用咗大約一星期，想同大家分享吓真實用後感。

我本身膚色偏暗啞，呢支底霜嘅紫色調好自然，推開後唔會令塊面變咗「殭屍白」，而係確實做到提亮疲倦暗沉肌膚，令成個面色即時白淨咗半度。適合想改善「黃氣」同「倦容」嘅朋友。
但因為有調色，真係要花少少時間推勻，如果求其抹兩下，鼻翼、下巴位會容易有「一撻撻」唔均勻嘅情況。

✅ T區（額頭、鼻）控油好：
香港夏天又熱又濕，喺冷氣房坐到下晝，額頭同鼻翼都只係微微泛光，唔會話油光滿面，妝容keep到放工都算完整，控油效果係令人滿意嘅。

❌ 下巴、嘴角位偏乾：
就係因為控油力強，對於我呢啲混合肌嚟講，下巴同嘴角呢兩個經常講嘢、郁動又多嘅位置，會覺得有啲乾爭爭。特別係喺長開冷氣嘅辦公室，經過全日，呢兩個位置嘅皮膚會見到少少乾紋。如果你都係呢類混合肌，強烈建議上呢支底霜之前，一定要喺下巴、嘴角、鼻翼兩側搽多一層保濕乳液/面霜打底，否則到下午呢兩個位會有「Hold唔住」嘅感覺。