SOFINA Primavista

持久控油防曬調色底霜 SPF50 PA+++ (第3代)

首先多謝 @cosme 抽中我試用SOFINA Primavista第3代Skin Protect Base UV50 EX。自己不嬲都有用開SOFINA裸色嘅base，又平又好用！用開beige係因為夠自然，試過其他brand紫色真係太白，唔上粉底根本出唔到街，所以base都係揀返beige😂

今次抽中clear blue就試吓啦！佢嘅質地依然一樣，好水潤輕盈，延展性極高，少少就夠搽全臉，上臉完全冇負擔，唔會覺得黐立立。以前用開 beige 係比較貼近膚色，而呢支藍色就可以修正暗黃。一搽完，面色即時白咗，嘴角呢啲暗沉位都透亮咗，但唔會假白，而且佢入面嘅微粒粉末對遮毛孔幾有幫助，薄薄一層已經令膚質望落去平滑咗，唔想化全妝嘅話搽完佢加少少遮瑕就可以出街。

持妝力方面，因為佢標榜升級咗防脫妝配方，啱晒香港天氣😂用咗佢打底，去到夜晚返屋企，個底妝都仲有七八成喺度，冇點溶妝或者變暗。呢支新版喺冷氣房坐全日都唔會乾，平衡水油做得幾好。絕對係繼續買嘅一支base。