水橋保壽堂

EMAKED睫毛精華液

作為一個長期受到睫毛短小、稀疏、容易折斷困擾嘅用家，今次有幸收到 @cosme送出試用水橋保壽堂製藥嘅EMAKED睫毛精華液，效果真係有驚喜，多謝 @cosme 🥰～
首先淨係睇個包裝已經夠吸引，包裝盒螢光粉紅撞黃色字體好搶眼，精華液玫瑰金色加上細細支好輕巧，刷頭設計精細，好似眼線液咁，可以精準塗抹喺睫毛根部，而且刷毛細軟，唔會拮到眼皮，美容液質地水感清爽，吸收快唔黏膩，無色無味好溫和。
我每晚睡前搽一次，搽咗約兩星期，雖然睫毛未至於即刻變到好濃密好長，但有幾點感受好明顯：第一，睫毛明顯變得強韌，甩少咗好多，以前洗面捽兩捽就甩幾條，而家真係冇咁易甩；第二，睫毛空洞位開始有細毛仔長出嚟，雖然未到好濃密效果，但視覺上冇咁疏落；第三，真係一啲都唔刺激，就算有時失手掂到眼周都唔會眼痛或紅腫，敏感肌都可安心使用！
以呢個價錢嚟講，性價比高，效果對得住價錢，我會繼續用落去，睇吓幾個月後會唔會更濃密纖長！
如果大家都受到睫毛短小稀疏易斷嘅困擾，呢支真係值得一試～🩷