shu uemura 植村秀

unlimited care 無限修護透光精華粉底 (透光瓶)

多謝@cosme 和品牌植村秀提供試用，今次嘅產品係觀望咗好耐嘅umlimited care 無限修護透光精華粉底液664號色。

呢款係屬於精華型粉底，所以我期望佢會係貼膚，滋潤度好，能提亮膚色。由於夏天天氣熱，只能夠揀一啲輕透嘅粉底，試用大約五日，可以講一講對佢嘅感受。本人係混合性膚質，夏天T位會出油，兩頰比較乾，所以粉底唔可以揀啲過分控油，但太滋潤T位會嚴重脫妝。

諗住佢係精華型粉底，質地應該係水潤，但原來係幾挺身又易推，上面後會有種滋潤嘅感覺。未上妝前皮膚有毛孔粗大膚色不均嘅問題，亦有一啲暗瘡印同雀斑， 由於要試佢嘅持妝度所以連base都冇用。上妝後，膚色有明顯提亮，毛孔遮到七成左右，遮瑕力約五成，可以疊加增加遮瑕度，但感覺都唔會厚重唔會卡粉。

測試嘅呢幾日又落雨，天氣又熱接近30度，定妝只有用定妝噴霧，大約七個鐘頭後，鼻頭開始冒油，但都冇出現白芝麻。鼻翼位置有少許溶妝，但整體仍然保持得好好，需要補妝上返碎粉就可以，整體效果滿意，全日都冇暗沉，上面嘅效果都唔會過於光亮，半啞光，出油後感覺更貼膚，塊面唔會繃繃緊，之後會試埋用base睇下持妝度會唔會再有所提升。

卸妝後皮膚狀態唔錯，冬天嘅時候可以再用到。