shu uemura 植村秀

unlimited care 無限修護透光精華粉底 (透光瓶)

shu uemura「小方瓶」無限粉底一向有口碑保證，出名打造持久、控油嘅霧面妝感；今次試用嘅另一系列unlimited care 無限修護透光精華粉底液，外型同小方瓶相差無幾，不過就主打自然透亮嘅妝效，同時加入養膚精華 —— 5%維他命B3，幫助皮膚抗氧化、抗炎，以及有助保濕滋潤嘅日本山茶花籽油，修飾肌膚之餘亦同步達到修護效果。




Shu uemura無限修護粉底液屬於輕薄、容易推開嘅質地，但仍然可以維持高遮瑕度，用粉撲輕輕拍開，已經遮蓋到皮膚大範圍嘅泛紅。雖然今次收到嘅色號664比我嘅膚色黃，所以全面上妝後膚色比平日暗，但今次粉底新加入嘅顏色微粒，利用左光線折射原理，即使膚色暗左，都睇得出整體均勻得嚟帶有自然嘅光澤。


香港近日嘅氣溫高達33度，出左一陣街已經熱到冒汗。印乾面上嘅汗之後，可以睇到化妝2個鐘同埋出汗後，妝容仍然貼服自然，無出現班駁、粉感嘅情況。之後帶妝12個鐘，期間都出入過幾次有冷氣嘅地方同埋悶熱嘅戶外，皮膚都無掹掹緊或者比粉底漿住塊面嘅感覺，全日感覺都好舒適。最驚喜嘅係法令紋、鼻翼都幾乎無卡粉，咁樣就算同朋友出成日街，都唔怕笑得多變左木偶咁嘅樣喇🙈