Benefit

反孔精英無PORE粉底

感謝@cosme抽中我試用呢隻新款粉底液。我係混合肌（T字位油👃🏻，兩頰偏乾），夏天出汗多易溶妝，毛孔明顯尤其鼻翼同額頭位。今次試嘅係色號：2N號，中性偏白，連續用咗一星期，仲特登揀正午太陽最猛時出街測試！

🌟 質地同設計：按壓泵設計，一按就出粉底液，質地偏水感輕薄，推開似絲絨霧面質感，乾得超快（真係要手快！），但好處係唔黏頭髮，夏天用爽手。 按一下嘅量差唔多夠全面，局部多毛孔位（如鼻翼）可以疊加多層，都唔會厚重，但要注意妝前保濕，太乾容易起皮屑。

👍 遮瑕&毛孔隱形力：有即時磨皮效果，薄薄一層已遮到暗瘡紅印同泛紅，想自然妝效就唔使額外用遮瑕膏！毛孔好似柔焦化，望落冇咁明顯。整體屬於自然啞緻妝感，唔會假面或粉感重，似本身皮膚好咗咁，仲帶微微霧光。

☀️ 控油&持妝實測：香港34°C出街半日（冇補妝），T位出油量比平時50%！用紙巾印只得輕微油光，冇溶妝或浮粉，防水力真係得！試過流汗後用濕紙巾印，粉底依然貼面。而且出少少油粉底同皮膚會融合更好，出油後變霧面奶油肌效果。氧化暗沉不明顯，呢點大讚！帶妝8小時後臉色依然白淨，冇變灰黃（試過好多粉底下晝就變灰面...）。

💦 夏日整體使用感：
透氣唔焗身，質地輕薄，冇黐口罩嘅尷尬印！成份控油貼膚，持妝全日我兩頰位冇出現明顯乾紋。連續用一星期，每晚卸妝後皮膚冇變暗沉或者變差。如果毛孔問題嚴重，可以妝前疊加Benefit毛孔細緻霜打底，柔焦效果再升級！

夏天想底妝貼服又抗油，呢支真係交到功課～ 有興趣嘅姊妹們不妨去專櫃試吓！😉