CeraVe

多重酸抗瑕疵修護精華

試用程度：因順豐延誤遲了收貨，只試用咗九日，前七日誤以為佢係暗瘡啫喱淨係搽咗喺暗瘡位，後一日早晚搽，最後一日夜晚搽完後有搭配同系列「A醇全效平滑祛印精華」使用。
橫跨了一個颱風，時正炎熱潮濕之季。
有與收到Cerave同系列「去油抗瑕白泥潔膚露」一起試用。
以往有用開Cerave的修復霜於濕疹皮膚上，自從佢被L'Oreal收購後就冇乜點再留意呢個品牌。

容器：●●●○○○○

高身tube裝，容易企唔穩撞跌，然後撞跌埋其他易跌嘅skincare變成骨牌…短短九日已經試過三四次。

自己衰，見佢tube裝又大大隻字寫住blemish control gel就冇睇清楚當咗佢係暗瘡膏咁用，但理解唔到點解Serum要咁包裝。

膠嘅質地係同系列三樣嘢入面最劣嘅，不過呢點唔影響使用。

大概唧一隻中指嘅長度就夠搽全臉。

氣味及質地：●●●●●●○

無香料，全透明gel狀，推開時微黏（似透明質酸精華），未至於笠但吸收速度不太快，會帶有輕微膜感。（圖中間為推開後狀態）
皮膚較薄/有傷口嘅位置推開當下會有些少灼熱，但好快就消失，後續亦無過敏反應等。

成分：●●●●●○○

由不同酸類組合而成，加上維他命B3 (Niacinamide)同Cerave最出名嘅Ceramide組合，功效包括但不限於：舒敏/抗發炎/修復皮膚…因為各種酸類排得前d，所以推斷產品取向應該係借B3+Ceramide幫助減少酸對皮膚嘅刺激，而唔係酸類幫助疏通毛孔後令B3同Ceramide更加有效護膚。

效果：●●○○○○○

不論係一開始用嚟搽暗瘡、全臉淨搽當serum，或當係同系列A醇精華前嘅輔助使用，三個功能都有種又雞肋又畫虎不成反類犬嘅尷尬感…

暗瘡方面不論事前預防、事發治療定事後去印修復佢都冇乜幫助，甚至有d搽完後暗瘡更紅；全臉淨搽亦無感，只覺得面油發得加多，夜晚搽完第朝滿臉油光好似番咗去青春期咁；同系列A醇精華如果淨搽，本身有輕微地令臉平滑些少，但事前加咗呢支serum打底的話反而會現毛孔凹凸感。

稍微有d作用嘅係代謝粉刺，連續搽幾日後大概減少15%，但之後繼續搽落去改變不大。

最有用係搽耳背，油脂味有消失！不過呢一點市面上大部分酸類產品都做到。

結論及建議：●●●○○○○

理解唔到呢支產品嘅定位何在，同系列出兩支夜用嘅精華然後一支有效一支雞肋，感覺就算一開始冇誤認佢做暗瘡膏個使用感受都分別不大……

暗瘡都係用番藥用成分會有效d，而作為酸類佢又冇比其他產品出色，呢個售價呢個包裝，可以先ignore。

最後附上台灣官網同系列嘅兩支Serum對比