ARMANI Beauty

水潤絲光氣墊修護粉底

好開心收到Armani Luminous Silk Prima Glow Cushion 試用邀請。一打開有驚喜，造型唔似平時標準圓形咁，好有設計感，同時塊鏡好大，放氣墊粉撲個位有個凹位卡住粉撲，令佢唔會跌出嚟。粉撲絨毛質地，有啲彈性，比平時用開既感覺細咗少少，三隻手指攝得入但有少少緊。

今次用1號色，輕壓一下取粉就上到半邊面，好易推開，唔會好快乾咗。薄薄一層遮到泛紅同輕微痘印色斑，重度黑眼圈都遮到少少，重點位置可以疊加去增加遮瑕度，大約遮到6-7成。上完cushion 肌膚有透亮感，睇落無面具感同好厚粉。光澤感好自然，尤其太陽光下蘋果肌既光澤好靚，靚到唔捨得上蜜粉遮咗個光澤感，所以我只係用咗定妝噴霧去實測佢既持妝力。

喺無冷氣既室內5小時，粉底無乜存在感，唔會覺得扯乾塊面或者好黏笠既感覺。5個鐘後喺陽光下睇仲見到個光澤感，好輕微既氧化暗沉，亦冇浮粉既情況。由於無用蜜粉定妝，鼻翼兩邊都有出油，用紙巾輕輕印走就無問題。10個鐘後法令紋有輕微積線，但由於只用定妝噴霧，呢個情況都係意料之内。如果夏天全日户外，都係建議用返蜜粉做定妝會更好。