DECLARÉ

水盈保濕面膜

我前嗰排皮膚出現咗問題，突然之間皮膚敏感，唔知咩原因搽咩都會敏感，就算係以前用開嘅化妝品或者護膚品都會敏感，所以最近開始已經將所有護膚品同清潔用品都轉做敏感肌適用嘅。

多謝 @cosme，真係推介啲專為敏感肌膚而設嘅護膚品畀我試用！DECLARÉ呢隻瑞士護膚品牌可以為皮膚屏障提高防衛力，穩定肌膚抵抗外來刺激、並深層修護受損細胞，均勻膚色、預防早期皺紋。

DECLARÉ 水盈保濕面膜同我以前用開嘅面膜唔同，我以前多數用片裝面膜、亦試過用泥狀嘅面膜，但呢一隻好似面霜質地嘅面膜真係第一次用。搽上面就好似平時搽乳霜咁樣，而呢隻搽10至15分鐘上面之後就要用水清洗。

不過唔知係咪得我係每搽上面嘅頭1-2分鐘都會有輕微嘅刺痛感，等大概10分鐘開始就會見到塊面吸收咗啲乳霜，之後我就會攞水沖走剩低嗰啲。用咗2個星期之後feel到塊面唔乾，同埋用完嗰刻塊面都清爽，起碼唔會好似皮膚敏感嗰陣爛面。

至於有冇效減淡乾紋/ 細紋就可能要keep住再試耐啲先知。

當兩個禮拜keep住用潔面啫喱同保濕面膜，我覺得塊面冇咁易乾同埋出街去到晏晝嘅T字部位出油量少咗啲，希望之後繼續用會可以更加做到「水油平衡」。重點係兩款都真係唔會令我敏感，所以敏感肌嘅大家可以放心使用！