HADA LABO 肌研

Premium賦活緊緻眼霜

多謝@ cosme俾機會我試肌研呢枝Premium 特濃賦活緊緻精華眼霜。我偏好枝裝嘅包裝，唔似廣口瓶又要另外搵匙羹，眼霜亦都唔會接觸咁多空氣，比較方便衛生。打開有個冰感按摩頭，可以直接搽上眼周，唔駛用手指好方便。冰感頭面積夠大，蓋到成個眼袋嘅長度，輕輕鬆鬆就搽得哂成個眼周部分。眼霜係透明gel狀，質地比較流質，有少少似搽緊精華。本身帶有涼感，配合冰感按摩頭搽，會覺得成個眼周都好冰涼，朝早用會覺得個人清醒啲。

按摩吸收之後皮膚表面會變得好清爽，完全唔黏，皮膚睇落會好似補咗水咁。不過大部份gel狀產品都有嘅共同問題，如過搽得太多未能夠完全吸收，乾咗之後再過度磨擦的話會出擦膠碎。
多次反覆試驗之後，我覺得最好用嘅方法係，用按摩頭搽厚少少做眼周按摩，之後由得佢吸收一陣，同時進行其他護膚程序，喺眼霜未完全乾哂嘅時候，用手輕輕抹走多餘嘅眼霜，之後清爽嘅皮膚表面就唔會有同化妝品打交嘅情況。我幾鐘意佢清爽補水嘅感覺，但以我有返少少年齡嘅皮膚嚟講，夜晚會期望用返啲更滋潤嘅眼霜。黑眼圈改善方面亦都未見到有明顯效果。推介佢俾未有太多眼部衰老問題嘅後生女，或者想要搵清涼去浮腫眼霜嘅人。