HADA LABO 肌研

Premium煥活抗皺滋養眼霜

多謝@ cosme俾機會我試用新上市嘅肌研Premium 煥活抗皺滋養眼霜。
我本身眼周肌膚比較乾，皮膚係薄到好透血管嘅程度。眼部最明顯係笑嘅時候外側有好多細紋，隨住年紀增長呢啲動態紋漸漸變成靜態紋，化妝之後紋就會卡住好難睇，呢個一直係好困擾我嘅問題，所以都嘗試過好多唔同品牌同成份嘅眼部產品，希望可以改善問題延緩老化。今次收到嘅除咗一盒廣口瓶包裝嘅眼霜之外，仲有一枝眼部按摩棒。本身我唔係好鐘意廣口瓶嘅設計，但係送嘅按摩棒有一個尖嘅部份，可以代替匙羹去拎啲眼霜出嚟，我就覺得可以接受。
✅按摩金屬棒方便好用
按摩棒嘅形狀都幾好揸手，用圓嘅部份按壓搽咗眼霜嘅眼周位置，幫助血液循環，我覺得唔錯嘅。因為收到嘅使用方法說明只有文字，寫按摩由下內眼角到外眼角，再繼續向上移動至眉骨同太陽穴 ，我覺得如果可以有完整一套按摩手法嘅教學就更加好。 ✅滋潤不黏膩可於妝前使用
眼霜本身冇香味，質地唔算非常油潤，有滋潤感但唔會黏膩，早晚都啱搽。我覺得搽完嘅即時感覺幾舒服，皮膚表面滑滑地，唔會話一按摩就乾晒。 搽完之後化妝都冇起擦膠碎，但對於我非常乾嘅眼下皮膚，佢未至於可以令我完全唔卡紋，我都係會另外搽保濕型底霜。 ✅改善乾紋
睇返before &after，持續使用14日之後，覺得乾紋係有改善，尤其是眼頭側邊有滋潤到乾紋唔見咗，但比較深嘅眼紋就冇可能咁快見到效果。至於黑眼圈，可能我本身比較嚴重，就唔係好感覺到有變淡。

整體嚟講佢以開架嘅價錢，包含保濕同抗老嘅成份，性價比算好高，我最鍾意用比一般多啲份量嘅眼霜去厚敷同做眼部按摩，專櫃品牌嘅眼霜單價太高就唔捨得咁做，推介俾眼部護膚新手同埋會做眼部按摩嘅人。我自己會持續使用，混搭本身用開嘅改善黑眼圈產品，亦都會考慮回購。