Charlotte Tilbury

輕盈無瑕粉底液 (NEXT GEN粉底)

今次收到@ cosme提供嘅Charlotte Tilbury嘅Next Gen粉底液，睇過好多化妝示範，都知道CT嘅底妝係偏歐美系，追求無瑕妝感，喺鏡頭下睇落真係好靚。啞光玻璃樽配 金屬色膠蓋，唔會做指紋收集器，相當唔錯。入面係泵頭，唧出嚟嘅份量都算易控制。 質地比較杰身，用手算容易推開。搽出嚟係霧面嘅感覺，修飾毛孔得嚟，都會有留返微微光澤感。顏色上有氧化，搽上去冇耐乾咗之後已經可以見到比新唧出嚟深色，過多一兩個鐘會更加深色，肉眼睇比我張相影出嚟更加明顯偏橙色。
今次我收到嘅係3N一般中性色，啱啱唧出嚟嗰陣比較啱我膚色，氧化之後就有啲太深太橙，想買嘅話建議去專櫃試 色先，同埋可能需要買更加淺嘅色號。 ✅中高遮瑕度修飾膚色不均
比起我用開啲日本品牌嘅粉底，CT 粉底 嘅遮瑕度真係好有驚喜，就咁用手指搽一層，已經可以遮住手背血管嘅顏色。我本身有啲好細嘅曬斑喺顴骨，CT 粉底一層已經可以遮得住，塊面顯得好平滑無瑕。

✅防水抗磨擦
CT粉底乾得好快，只要佢乾咗基本上都set好咗，我就算用紙巾大力捽，皮膚都仲留有粉底嘅顏色。
我本身工作需要長時間戴口罩，粉底黐喺口罩上面嘅情況唔嚴重，呢方面我覺得幾唔錯。

✅輕盈不厚重
以遮瑕度咁高嘅粉底嚟講 ，佢搽上面唔會覺得杰到黐住啲毛孔，而且本身乾得好快表面會好快變清爽， 俾到面部皮膚嘅感覺係輕盈嘅。

上妝後嘅效果👇🏻我嘗試過用唔同方式去上粉底，暫時覺得效果最好嘅，係分區直接點上面再用平頭掃掃開，可以好輕易達到均勻平滑嘅效果。

對於混合性乾肌再加有鼻敏感嘅我，鼻翼時不時會有皮翹起，啱啱上粉底嘅時候完全冇問題好貼服，返工戴咗八個鐘口罩之後，鼻翼嘅粉底卡喺乾皮上面，亦都見到有啲乾紋現形，建議同我一樣情況嘅朋友，要事先做多啲保濕去死皮工作。