PANTENE

3秒奇蹟髮油 (雪松玫瑰)

大大感謝 @cosme 抽中我想用呢樣產品，因為對佢，我概括嘅感想係兩個字: 驚艷！
👆🏼先解釋吓我嘅頭髮狀況，因為長期使用造型產品，每日都會用直髮、曲髮夾，加上曾經染髮，頭髮受損情況都幾嚴重，喺冇用任何護髮產品下，毛躁 可以好明顯，尤其是係最外面嗰層頭髮，開叉以及乾旱 情況嚴重
呢枝產品之所以令我感到驚喜，係因為真係有助我改善開叉、毛躁嘅情況 ，而且效果係即時可見！
乾頭髮之下使用佢，瞬間見到頭髮變得順滑，而且非常貼服，毛躁情況大大減少 ！效果好明顯！
另一個喜歡佢嘅原因，係因為使用感受非常好
其實坊間都有遇過其他護髮產品係可以做到令頭髮瞬間貼服，不過呢類產品多數會油膩感重啲，大多數都會令頭髮較為黏笠，對於香港而家天氣仍然炎熱嘅情況就唔係咁合適
不過呢支護髮油，真係非常薄，延展性好高
從圖片可以見到，我唧左喺手背，油唧流動性高之餘，捽完喺頭髮上面，瞬間手背已經冇晒油印，證明產品唔會過分油膩
有朋友可能擔心，使用完護髮油之後，頭髮嘅油膩感重咗，可能比較難做造型，尤其係頭髮會吹唔起，或者感覺扁塌
但我當日一用完呢枝產品，直接就返工set頭。用完直髮夾、再用梳梳順頭髮，見到頭髮明顯變返蓬鬆一啲，同啱啱用完產品之後非常貼面嘅狀況已經有分別， 完全唔怕因為用咗油類產品而令到頭髮造型有影響！
而且對比起一朝起身未用護髮油，明顯見到頭髮多咗光澤感！

不過產品都有兩個狀況，值得留意

首先係產品嘅開蓋方式係扭蓋，一邊係鎖實， 一邊係開啟，我個人就唔係太喜歡呢類型開蓋方式，尤其是帶去旅行，好容易郁到個蓋，變咗產品會流出

第二就係原本我對產品嘅雪松玫瑰味好感興趣，我知道坊間好多人甚至會用護髮油代替香水，鍾意佢自然啲，呢枝產品一開蓋香薰感好濃郁，但係可惜用咗頭髮之後 ，香味好快消散，持久度唔係咁高

不過佢真係幫到我改善頭髮質素，所以呢一點都已經大大提升我對佢嘅好感，用完呢支試用品，我應該都會再自己回購！