Bioré

瞬間極淨卸妝噴霧

噴霧式卸妝油，首先的確係懶人恩物，因為噴上面後一沖就乾淨。但同時其實都有相應嘅缺點：

1. 噴時唔係每粒噴霧都會降落喺面上，其餘會落咗地，變相你必須喺可以洗地嘅地方使用，例如浴室內，否則地面會好油好危險

2. 卸除任何底妝甚至眼影、唇妝，都係冇問題，但冇法卸除眼線Gel及眉筆，呢兩個位始終唔捽係唔甩。試過唔捽就咁沖，會甩少少但成條眼線仍然明顯。眉就基本上冇卸到。

3. 同一般卸粧油一樣，會乸眼，入口會苦，而且因為佢係噴霧，份子比較微細，更加容易入眼入口

4. 一沖水當下，膚感係滋潤唔乾的，但過後不久其實都會有繃緊感覺，可能加上冬天，所以始終有啲乾

如果只係化日常底妝，呢支噴霧卸妝油絕對好用

另外日文指引冇寫過可以沖涼時用，但中文指引寫適用於沐浴時刻，話沐浴同時卸妝，仲話溫水同蒸汽可幫助打開毛孔，有效溶解並清除毛孔深層污垢同彩妝，但其實成個指示好矛盾。

佢必須要乾面噴，如果係乾面狀態，又如何有溫水同蒸汽打開毛孔？如果有溫水同蒸汽，即已經唔係乾面了。如果我先喺浴室外乾面噴，再入浴室沖涼，因佢都會乸眼，所以等於我要合埋眼摸入浴室，而且地面會有油，又係會危險。
最後測試係拎入浴室，先噴後摸索放低支油，再摸索開水洗面，其實都係比較論盡。
如果一支要$100，其實唔算好值，不過噴咗5日容量都冇乜變少，應該都算襟用。

好奇如果我用普通卸妝油噴面，唔知會唔會有同樣卸妝效果？