KOSE 雪肌精

雪肌精 BLUE 雙層透潤精華水

今次拎到嘅係雪肌精 BLUE 雙層透潤精華水 I (清爽型) 嘅試用裝，細細枝都依然見到有分兩層，用之前要上下搖均再搽上面。因為對雪肌精blue嘅產品比較少認識，所以做咗少少資料蒐集，品牌嘅產品係主打接受大自然的恩惠，同支持可持續發展嘅循環，所以會加入好多天然來源嘅成份。✅清爽不黏膩
倒出嚟係乳白色嘅，比以往用過嘅精華水類型產品流動性高，質地更加似爽膚水，精爽唔黏膩易吸收，夏天搽會覺得好舒服。加上本身帶有淡淡嘅香味，搽嗰下會覺得好舒服好relax。

❓ 保濕度一般
我本身係混合性乾肌，好老實佢嘅保濕度對我嚟講唔係好夠，就算我重覆疊加都唔會潤好多，感覺係輕微補水，唔影響後續護膚。不過我知道品牌有出另一枝柔潤型，有照顧到唔同膚質嘅人。

✅美白抗氧化成份
睇返佢加咗啲和漢植物成份，包括高麗人參、白山竹、旋覆花、黃連、薏仁發酵，係啲美白保濕抗氧化嘅成份，相信長期使用對膚質會有改善。佢未必係好似市面上熱門嘅抗氧化單一成份咁，話俾你知喺皮膚有咩原理，而係好似睇中醫咁慢慢溫和調理膚質。
我都係用咗個幾星期，唔可以期望即時見到毛孔收細嘅效果，但整體冇敏感情況，可以繼續用去期待效果。附上一張before& after。外觀上睇膚質冇明顯大分別。

一個要注意嘅地方係佢有加酒精，如果係對酒精敏感嘅朋友要小心使用。整體我推介俾出油量比較多嘅皮膚使用。