BIODERMA 貝膚黛瑪

水活保濕精華肌底液

好開心今次抽中咗@cosme BIODERMA【科研保濕 1+1 組合】試用邀請❤️

我自己對Bioderma呢個品牌印象都唔錯，一直keep住用緊佢紅蓋嗰款卸妝水，覺得好好用，卸得乾淨之餘唔會令皮膚乾/油，亦冇香料味，今次藉呢個活動可以試試佢嘅保濕產品！

咁講咗「水活保濕精華肌底液」先，呢支係建議喺上精華前用，可以更加保濕嘅。

首先喺質地上，呢枝肌底液倒出嚟係水狀嘅，好易流動嘅質地。我本來以為佢呢個質地用落會係清爽到近乎水咁，但用落又唔完全係，佢水狀唔會太笠，但係係會有少少存在感、有少少保濕膜嘅感覺。但因為佢係用嚟配合保濕精華用，呢個程度我係ok嘅。

其次要講嘅係滋潤度同吸收速度，呢款肌底液搽完之後都算快吸收，同埋都有一定保濕效果，以水狀、精華前用嚟講，保濕度已經好足夠。

另一方面要講嘅係佢嘅產地、包裝同容量，要讚一讚佢兩枝都係made in France嘅產品嚟，佢嘅樽口對於有時會將化妝水/肌底液倒落化妝綿用嘅我嚟講，係方便嘅，同埋佢個設計都唔會令平時使用時會一次過倒咗太多。如果想用噴霧式，都有噴頭提供，只不過額外附加嘅噴頭係中國製，所以我冇用。而佢都幾大支，拎到嘅時候我都驚訝比想像中大，容量有200ml。

最後，我想講嘅係佢嘅保濕效果，而呢樣因為我覺得係肌底液同精華加埋嘅效果，所以呢樣會一齊講，我由3月20號收到當晚開始用，大約都用咗12、13日左右，我自己係覺得保濕效果幾好嘅，因為近幾日開始熱，我夜晚有開冷氣，而第2朝皮膚都唔會覺得乾，同埋可能加上佢成份有包含水楊酸，用咗呢段時間之後都覺得臉頰皮膚摸落有嫩同滋潤咗。

總括嚟講，Bioderma嘅產品冇令我失望，佢嘅保濕效果係做得幾好嘅，我自己會覺得比較適合夏天夜晚開冷氣/冬天時用，不過佢會有少少成膜感，如果唔鍾意成膜感嘅人就要自己取捨。
（P.S.呢2款產品用嗰陣都係冇香料/香精嘅味道，呢樣我好鍾意，因為我個人揀護膚品都偏向揀冇香料嘅）