L'ORÉAL PARiS

超水光精華

踏入30幾歲之後，我真係覺得皮膚狀態同以前有分別。以前捱夜，第二朝洗把面就算，而家只要連續幾晚瞓得唔夠，塊面即刻又乾又暗啞，眼底同法令紋位置都會特別明顯。加上平日返工長時間對住電腦，朝早趕住出門口，夜晚返到屋企又未必可以早瞓，一日仲要不停出入冷氣地方，皮膚成日都處於「出面又熱又焗、入到室內又勁乾」嘅狀態，真係幾難搞 (´･_･`)

我自己屬於比較容易缺水嘅膚質，尤其兩邊面頰、鼻翼同嘴角最明顯。有時朝早化妝已經開始卡粉，去到下晝更加容易覺得塊面繃緊，但偏偏T字位又會出少少油。所以揀護膚品對我嚟講都幾麻煩——太清爽又驚唔夠保濕，太滋潤又怕香港天氣用會黏笠，搞到成塊面油淋淋就更加唔掂。

今次試咗 L’ORÉAL PARIS 全新「超水光」系列，一套有3支，護膚次序都幾 mi簡單。

第一步係 超水光精華水，質地係透明水感，但又唔係好似清水咁稀，帶少少潤澤感。拍上面之後幾快吸收，唔會有黏笠感，呢點幾正喎～ 朝早趕時間用都幾方便。

第二步係 超水光精華，同樣係透明質地，但會比精華水濃身少少，有少少啫喱感同流動性。推開之後幾滑，皮膚即刻有種水潤感，我自己會特別搽多少少喺兩邊面頰、鼻翼同容易出乾紋嘅位置。

最後係 超水光精華乳液，白色乳液質地，三支入面感覺最滋潤。本身第一眼見到仲以為會比較笠，點知推開之後又幾輕身，唔會有厚厚一層黐住塊面嘅感覺。

三支逐層搽完之後，我第一個反應係：「咦，都幾清爽喎！」本身仲擔心三樣一齊用會太潤，但吸收之後摸落唔會黏笠笠，皮膚表面反而有種自然嘅水光感，望落幾飽滿，紋理都好似柔和咗少少。有滋潤感但又唔會變成油光滿面，呢種 finish 我幾鍾意 ♡

第一晚三支一齊用，第二朝起身第一個感覺就係：「咦，塊面真係冇咁乾喎！」平時我成晚開冷氣瞓，朝早兩邊面頰同嘴角好多時都會有少少繃緊，洗完面之後更加明顯。但嗰朝摸落皮膚軟熟咗，鼻翼位置亦冇平時咁乾，成塊面有種水分keep得住嘅感覺。

當然用一晚唔會話膚質突然有咩大轉變，但對我嚟講，朝早起身冇嗰種「乾到想即刻搽cream」嘅感覺，已經幾有驚喜。尤其前一晚照樣開住冷氣瞓，本身預咗第二朝又乾又繃，點知又真係幾掂。

用到第四朝，啱啱中間有兩晚都比較夜瞓，本身已經預咗照鏡一定又係一臉倦樣，點知第一下反而覺得：「咦，都唔錯喎，冇想像中咁殘。」面色當然唔會突然變白或者好似開咗filter咁，但暗啞感冇咁重，兩邊面頰開始有少少自然水潤感，成個人望落精神啲 ( ´ ▽ ` )

另一樣我幾有感嘅係上妝。平時瞓得唔夠，再加上返工長時間坐冷氣房，底妝去到中午已經好容易浮粉，鼻翼同面頰更加會見到乾紋。有時朝早明明化得好好，下晝一照鏡就會忍唔住心諗：「搞咩呀……」但用咗幾日之後，朝早上粉底明顯貼服咗，去到下晝乾紋都冇咁搶眼。對日日要化妝返工嘅我嚟講，呢個改變幾實際。

去到第七朝，起身第一下已經覺得皮膚狀態比第一日穩定。前一晚雖然照樣夜瞓，仲碌咗一陣電話先瞓，但第二朝冇以前咁容易乾到繃住。兩邊面頰摸落滑咗，鼻翼同嘴角冇咁粗糙，洗完面之後亦唔會即刻覺得乾。

照鏡時見到面色冇咁暗啞，皮膚表面有返少少自然光澤，望落精神咗；原本比較明顯嘅乾紋，因為皮膚冇咁乾，視覺上都柔和咗少少。嗰刻真係會覺得：「正喎，原來keep住用幾日真係有分別。」(๑•̀ㅂ•́)و✧

對我呢種30幾歲、生活節奏快、成日出入冷氣地方，又唔可能日日11點前瞓覺嘅香港女性嚟講，我反而最重視護膚品係咪容易持續用。呢套三支一齊用都唔會太厚重，朝早趕住返工都唔使等好耐先可以化妝。

連續用7日之後，我最實際嘅感受係皮膚冇咁容易乾、底妝貼服咗，同埋朝早照鏡時冇咁「攰樣」。唔係話七日就突然變咗另一個人，但整體水潤感、柔滑度同自然光澤真係比第一日好。作為日常保濕護膚，我覺得幾啱用，都會想繼續用落去 ♡