NARS

自然霧光持久粉底液

今次試用NARS 全新 NATURAL MATTE 自然霧光持久粉底液，色號係L2 Mont Blanc（極淺色 - 中性色調），個人覺得呢隻色號夠大路，適合大部份香港女仔膚色。

呢款粉底液係霧光妝效、比較自然，亦有中度至高度遮瑕、可以修飾毛孔。質地係半流質，未去到非常流動嗰隻。

正常撳兩三下就夠用一次妝、我平時都淨係上一層就夠，不過今次影俾大家睇就㩒多咗幾下🤣 提提大家喺撳出嚟用之前要搖晃幾下先。

個人覺得遮瑕度都OK。呢一個係我由素顏到齋上一層粉底未用遮瑕嘅效果，比較明顯嘅瑕疵（例如雀斑）係遮唔到嘅。不過我啲雀斑就不嬲都冇粉底係可以齋上就遮到，所以其實遮瑕效果都已經滿意，起碼毛孔同埋其他微小印都遮到、亦即刻改善到暗沉。一上完塊面係即刻見到自然嘅霧光光澤。

NARS 呢隻粉底液上臉完全冇黏笠嘅感覺，係真係輕盈同貼服，同埋就算過咗10個鐘嘅冷氣同室外嘅環境都冇甩妝，個人亦都冇任何補妝嘅習慣。

我係混合肌、T字部位容易出油、再加有時係敏感肌，雖然帶妝10個鐘後，T字部位依然有出油，但冇特別有溶妝或氧化嘅感覺、甚至係個鼻出咗油之後啲油光反而更加自然😂。
不過唔知係咪因為我塊臉敏感肌，所以第一次將粉底搽上臉嘅時候竟然有少少刺痛嘅感覺，但好彩最後係冇敏感嘅。

多謝 @cosme 提供試用！