L'ORÉAL PARiS

金致臻顏花蜜奢養膠原輕盈乳霜

步入3字頭之後一直好努力試唔同嘅抗老面霜。本身屬於混合性偏乾肌嘅我 ，好多抗衰老面霜對於我都太油太黏 。今次有幸抽到試用L’Oréal Paris嘅膠原小蜜罐，用咗一星期左右，整體感覺非常之好 。 廣口瓶包裝附送一個小匙羹，本身唔太喜歡呢種包裝，如果有位將小匙羹同個樽貼埋就會更好收納，不過好多面霜都係呢種包裝，就唔要求咁多啦。
香味好淡搽上面之後基本上聞唔到。✅質地輕盈不黏膩
我最喜歡就係佢嘅質地，非常好推開，保濕度啱啱好，唔會好油黐頭髮，又比一般乳液滋潤。
日頭用完化妝唔會起擦膠碎 ， 就算之後再搽防曬同底妝都唔會覺得焗。夜晚搽有滋潤感得嚟唔會黐哂落枕頭。以往用好多抗衰老面霜都做唔到日夜都啱用嘅質地。

✅強化皮膚屏障
喺試用之前咁啱皮膚有唔穩定嘅狀態，有少少痕同甩皮。搽完第二日真係有種舒緩咗嘅感覺，唔再紅。喺試用嘅呢一星期，皮膚冇再出現明顯嘅敏感跡象，亦都冇爆粒粒，膚況相對穩定。

✅改善乾紋提升光澤感
剛剛好嘅滋潤度明顯有填平面上面一啲乾紋細紋，令皮膚睇落更有光澤更有精神。

附上一張before& after
最近我好在意嘅係眉心嘅紋路，開始由動態紋變淺淺嘅靜態紋。可以見到搽完小蜜罐之後，紋路有變淺到同埋皮膚更有光澤。
始終我暫時只係用咗一個星期，好難即時見到明顯膠原蛋白增生帶嚟嘅效果，產品本身都係提供使用8星期後嘅評估，所以我實在唔會喺呢刻話即刻明顯睇到輪廓提升蘋果肌飽滿。
但我覺得佢做得到一個舒服嘅質地，令人願意早晚keep住用，已經係一件好產品，加上我對玻色因呢個唔刺激嘅修護成份都相當期待。我會繼續使用，期待佢之後帶嚟更多抗衰老效果。