L'ORÉAL PARiS

金致臻顏花蜜奢養膠原輕盈乳霜

多謝@cosme抽中我，有幸率先試用全新升級嘅金致臻顏花蜜奢養膠原輕盈乳霜！跟住建議連續使用左7日，而家同大家分享下用後感~

質地方面，作為一款乳霜，佢滋潤得嚟都幾輕盈，延展性幾高，唔算好厚重，搽完會帶輕微膩笠感，吸收都算快，唔太會癡住d頭髮，重點係一d都唔油，仲帶有淡淡香氣，聞起嚟幾舒服，春夏天用都完全無負擔。

滋潤修護效果亦都幾出色，滋養度屬中等級別。化妝前薄塗一層，後續底妝超貼服唔卡粉，連出入冷氣房同高溫戶外環境，d肌膚都可以維持穩定，唔會泛油光或者乾燥繃緊。

使用後肌膚光澤感亦都有提升，唔係誇張嘅油光，就算上妝之後都仲保留到微微自然光澤感，令成個妝容精緻感提升左。

改善膚質同毛孔方面表現都唔錯，輕輕摸塊面會覺得肌膚柔嫩彈滑左，皮膚乾燥粗糙感都大大減少，毛孔亦都無咁明顯。至於改善細紋方面效果都ok，眼周細紋有減淡。

另外，輪廓緊緻同蘋果肌飽滿呢方面，唔知係咪我只係用左7日，暫時未有好強烈輪廓提升左嘅感受。

使用呢款乳霜期間我整體膚況亦都幾穩定，試用期間無爆痘，無敏感或者唔舒服。用佢黎日常護膚或者妝前打底都適合，皮膚維持到水潤亮澤嘅狀態。

整體總結：呢款升級版膠原小蜜罐輕盈乳霜真係做到滋潤唔膩，修護皮膚，質地討喜。7日已經見到膚質、光澤度、細紋有所改善，適合想初抗老，改善乾燥皮膚嘅女仔。至於補充膠原方面，可能要試耐d先知功效如何。