KOSE 雪肌精

雪肌精 BLUE 水潤透亮防曬精華

防曬精華呢個種類嘅產品，好似今年先開始聽人講，一直都好好奇究竟同平時用嘅防曬有咩分別。好開心今次有幸試用新出嘅雪肌精 BLUE 水潤透亮防曬精華，呢款產品新到好少人講，就算搵日本嘅媒體都唔係好搵到資料，所以我主要以個人第一印象分享。包裝係陶器滴管樽裝，淨係睇外觀都覺得好靚，放喺化妝枱賞心悅目。相對佢都比較重身，冇咁方便帶出街用，所以我只係朝早搽完一次，就唔會拎出街補。
本身帶有少少防曬味，搽嗰下會聞到，但唔會一路都有唔算太難受。✅保濕度剛好
依家成日落雨又熱又潮濕，唔會想又面霜又防曬咁搽又焗又唔舒服。佢搽落質地比較似乳液，清爽得嚟有少少滋潤度，唔會太焗。✅均勻膚色
本身帶有淡淡粉紅色，推開會有少少tone up效果，同埋皮膚會多咗少少光澤感。我喺膚況相對好嘅日子會單搽佢再加遮瑕就出街，減少大熱天時溶妝嘅機會。俾大家睇下個tone up效果。

❓防曬效果未知
產品標示有spf40 pa+++。我未見過網上有人做實測，所以唔係好敢信佢嘅防曬度。以我本身容易黑嘅程度，晴天嘅日子我唔用spf50+ pa++++嘅防曬係唔敢出門嘅。所以我會揀陰天雨天先單用佢，至於晴天我會on top再疊加防曬，但都幾驚喜係就算我再疊防曬再化妝，都未試過搓擦膠碎。

整體我嘅使用感都幾良好，與其當佢係精華質地嘅防曬，我會當佢係有防曬度數嘅日用乳液，根據返每日嘅日曬程度，去配合喺日常保養當中。