KOSE 雪肌精

雪肌精 BLUE 水潤透亮防曬精華

今次試用嘅係 雪肌精 BLUE【水潤透亮防曬精華】，最近天氣又熱又曬，我基本上每日朝早都會用佢做最後一步防曬。
呢支防曬一開始用嗰陣，其實都有少少擔心會唔會偏乾，但佢嘅質地比我想像中水潤，係偏精華感多過傳統防曬，推開好滑，唔會拉扯皮膚，對乾肌嚟講都幾友善。吸收速度都幾快，上面之後皮膚會有一層薄薄嘅保濕感，但唔會焗住。
我幾欣賞佢唔會泛白，亦唔會同底妝打架，之後上粉底都幾貼服，冇起擦膠碎或者卡粉情況。成日都會覺得防曬用耐咗會乾，但呢支反而可以keep到皮膚有啲水潤感，日間冷氣房都唔會覺得繃緊。
整體嚟講，我覺得呢支係比較清爽但又兼顧到保濕嘅防曬，對我呢種乾肌嚟講用得幾舒服，夏天日常用都冇負擔。