Charlotte Tilbury

輕盈無瑕柔光蜜粉 #磨皮銀餅

好開心今次抽中咗@cosme CHARLOTTE TILBURY 【輕盈無瑕柔光蜜粉 #磨皮銀餅】試用邀請❤️

我本身對CHARLOTTE TILBURY呢個品牌嘅粉餅印象唔錯，有用緊佢金色嗰款有色粉餅，而且用到中間已經開始見鐵片🤣（最後嗰張相就係我用緊嘅金餅），金色嗰款有色，所以有少少遮瑕度，而且粉質幼細，上完之後會有磨皮感，過咗幾個鐘出油之後效果都好靚，見今次CT竟然出咗新粉餅就即刻想試下！

我見介紹呢款係銀餅係白色粉，有柔焦、提亮效果都好期待。

首先喺粉質上，呢款粉餅同我本身用嘅CT金餅一樣，粉質都係好幼細。本身我打開銀餅，見到d粉嘅時候其實我有嚇一嚇，因為佢個粉望落係有少少帶閃嘅（我張相盡量睇下影唔影到個閃嘅效果出嚟），而我其實幾驚全面定妝嘅粉餅/碎粉帶閃，因為之前用過一款帶閃嘅，效果麻麻，個人好似浮腫咁。不過呢款銀餅用落我係覺得有驚喜嘅！

其次講返佢上臉嘅效果先。講一講即時上臉效果先，雖然d粉望落好閃，但上臉之後其實唔會好閃，而係塊臉好似有d提亮咗、plump咗咁，而且佢都有做到金餅嘅磨皮收毛孔效果，同埋唔會乾/顯紋！

另外，喺上臉之後隔咗幾個鐘，開始出油之後，佢都有做到金餅嗰種效果，唔會浮粉，而係變咗皮膚好好嘅奶油肌咁！

最後要講嘅係佢嘅產地同包裝，因為而家越嚟越多唔同嘅產品變成made in PRC，但我自己唔會揀PRC產品，佢呢個粉餅係made in Italy嘅！而包裝方面，CT粉餅嘅包裝我一直覺得好靚，而且個盒好薄身方便帶，入面攝個薄撲就已經好夠，之前買金餅都係有被包裝吸引嘅原因🤣

總括嚟講，CHARLOTTE TILBURY嘅粉餅冇令我失望，佢銀餅有保留返金餅嘅優點，只不過兩者有少少唔同嘅係，金餅係有色嘅粉餅，比較適合需要有多少少遮瑕度/冇咁明顯提亮嘅人。而銀餅比較適合想多少少提亮飽滿，遮瑕度要求冇咁高嘅人（但都係有磨皮效果）。

我自己而言，如果我用晒呢兩個，再買應該係會買銀餅，因為鍾意佢雖然望落閃，但上臉係睇唔出閃嘅提亮效果。
（P.S.老生常談，呢款產品用嗰陣都係冇香料/香精嘅味道，呢樣我好鍾意，因為我個人揀護膚品都偏向揀冇香料嘅）