AHC

醫美逆齡活膚全面眼霜

自己本身係混合油性肌膚，平時揀眼霜都會比較小心，最怕質地太厚重會容易出油脂粒。試咗 AHC 呢支「醫美逆齡活膚全面眼霜」一段時間，整體感覺幾滿意，最重要係冇出油脂粒。

佢嘅質地屬於偏薄身嘅類型，搽上眼周幾容易推開同吸收，唔會有負擔感。比較特別嘅係，佢吸收咗之後唔會完全乾晒無痕跡，反而會睇到皮膚表面帶點水光感，保濕效果幾明顯。另外，眼霜聞落有淡淡嘅果香味，味道唔算濃，用嘅時候感覺幾舒服。

包裝方面，佢自帶嘅 T 字型金屬按摩頭設計得幾貼心。出口大細啱啱好，幾容易控制每次唧出嚟嘅份量。金屬棒嘅闊度貼合眼周，用嚟按摩時有微微嘅清涼感，表面平滑，配合眼霜慢慢按摩眼部，體驗幾好，算係好聰明嘅設計。

至於效果，我覺得佢對即時填補細紋幾有幫助。搽完之後，眼周一啲好細嘅紋理望落會飽滿返，之後上妝就無咁顯眼。而我眼底一條長期都有嘅深乾紋，雖然未至於可以靠佢完全撫平，但只要喺上妝前用呢支眼霜配埋金屬頭按摩，之後上粉底，嗰條乾紋就冇再出現卡粉嘅情況，呢一點對我嚟講幾驚喜。

因為見佢對眼周細紋嘅即時填補效果唔錯，加上佢寫明係「全面眼霜」，所以我嚟緊會繼續使用佢，打算試埋搽落虎紋同埋頸紋位置，睇吓之後會唔會都有驚喜!

總結嚟講，質地啱混油肌，保濕力夠又唔厚重，加上個按摩頭幾實用，係一支幾踏實、表現平均嘅眼霜，帶去旅行用應該幾萬能，感覺幾安心。