SUQQU

絕緻艷澤粉霜 e

試用程度：收到試用後用過四次，均以不同手法及上妝後去不同環境，惟實在太唔夾目前天氣最後打入冷宮。容器：●●○○○○○
樣靚、墜手，擺喺檯面艷壓群芳，可惜中看不中用。
第一次開未用已經見到蓋底有圈粉跡，然後先見到佢個隔蓋係一個好薄似即棄嘅膠片，當中亦無空間放置附贈嘅膠挖棒，用嘅時候要另外再鋪紙巾放支挖棒，超不方便。
本身用罌裝衛生上已經構成較高風險，開口大概3-4cm大，粉底一次無需大量挖取時唔知點解要用罌包裝，霜狀未厚重到不能用Tube裝/泵裝吧？
氣味及質地：●●●●●○○
極淡的香味，雖然個人偏好無香料但因為實在極淡所以冇問題。
本身以為質地會似蛋白霜，實際摸上手覺得比較似軟化接近融化嘅牛油嘅乳霜狀，潤而不膩。
上臉後會有一層存在感，未至於焗皮膚。但可惜香港長期都濕熱，就算定咗妝心理上總會覺得唔夠清爽有種不安全感。
易推開但不易推勻，可能因為呢個texture點都會有個厚度喺到，變成有點考驗上妝技術。

成分：●●●○○○○
試用說明提及加入咗13種日本產嘅美容提取物作長效保濕，睇番成分表的確有一堆對皮膚友善嘅成分。
可惜嘅係成分表當中見到凡士林同排得好前嘅桂皮酸鹽：凡士林應該係針對產品質地嘅調整作用，但個人唔喜歡長時間大面積咁放上臉，就算妝感睇唔出或唔致粉刺，自己皮膚始終都會有個厚重感；桂皮酸鹽係防曬用途，同時間係一個好有爭議嘅成分，有干擾內分泌嘅嫌疑。
其實粉底始終唔係護膚品，護膚成分唔洗添加太多，反而有害又對妝效冇影響嘅成分比較令人卻步，我自己會寧願佢唔做咁潤同冇防曬功能但要番個乾淨d嘅成分表。

效果：●●●○○○○
遮瑕度四成，配合手法可以令膚色變均勻同有光澤，但質地關係剛上時會唔夠貼服同有厚重妝感。
出油後融膚度高，定妝後全日擤鼻都大概剩到一兩成遮瑕度。
莫名其妙嘅係，眼同咀等比較多表情嘅位置會突然成區冇咗d粉，變咗好似上完粉冇推勻咁，超級尷尬😥
擠出後好快會輕微氧化變得有點粉紅調，長時間後輕微變暗沉，尚可接受。

結論及建議：●●○○○○○
佢嘅存在係適合擺出嚟睇/suqqu fans集郵用，諗唔到有咩其他場合或時節啱用，唔認為等冬天就會改善到佢嘅缺點。
明明改版後粉底液咁好，系出同門嘅粉底霜反而咁樣，實在可惜。
（左邊部分推開並放置後嘗試用紙巾抹開，可見剩一兩成遮瑕度；右邊部分為新搽粉霜，供對比氧化色差用）