SUQQU

絕緻艷澤粉霜 e

SUQQU最近進駐香港，勁好！以前佢永遠長駐係日本嘅to shop list，由粉底霜到粉底到cleansing cream。最近用咗新版嘅粉霜，光澤感比上一代有提升，質地仍然好似醇厚嘅忌廉咁，延展性好好，用大概一粉珍珠咁上下大細嘅份量，就夠推勻全面，非常融膚。

上完妝嘅妝感係好乾淨、高級半霧面帶輕微光澤。膚質睇落好細緻咗，遮瑕力普通，要用返自己嘅遮瑕膏幫手。過咗兩三個鐘左右係最好睇！皮膚熱力令粉底扣緊咗，由輕微光澤變成柔焦效果好自然，暗沉問題好輕微，大概唔夠半度，毛孔被修飾得好自然。時間耐咗，膚色仍然明亮有自然光澤之外，係夏天冷氣環境出入都無起乾紋或者甩妝，經得起時間考驗！可能同粉底霜本身有13 種日本產美容提取物有關係。因為佢本質上依然係滋潤型粉霜，所以夏天最好定時補一補碎粉，避免由靚靚「奶油肌」過界變成「油光滿面」。

粉底霜闊口設計就難以理解，我自己放棄買佢上一代嘅粉底霜都係因為闊口樽嘅設計，而轉買咗pump 頭嘅粉底，即使遮瑕力比粉霜更低。開口咁大衛生難搞之餘，產品都會頻繁接觸到空氣，而且每次都只係用珍珠咁多嘅份量，長遠而言唔知會唔會影響品質，希望無事，因為粉底霜本身係好用㗎，唔想因為設計唔好而浪費咗。