M.A.C

亮肌輕透精華氣墊粉底 #鎖光小金盒

感謝今次揀咗我參加 M·A·C 呢款亮肌輕透精華氣墊粉底嘅試用～因為我日日都需要化妝，所以平時都會比較留意底妝產品，今次可以試到一款新氣墊都幾期待。首先想講下個包裝，小金盒個黑金色外殼真係幾靚同幾有型，拎出街補妝都輕身幾有質感，唯一缺點係會容易有指紋。粉撲就係尖頭型設計，用尖尖位化眼下、鼻翼呢啲比較細嘅位置會方便好多。最近香港真係又熱又濕，我自己係混乾肌，夏天又比較容易出汗，所以平時用粉底或者 BB Cushion 有時都會遇到脫妝、斑駁嘅問題，對氣墊嘅持妝力同保濕度都幾有要求。

今次用落覺得氣墊質地比想像中輕身，幾容易推開，用粉撲輕輕拍幾下就可以上得幾均勻。我自己日常其實只上咗一層，遮瑕度已經幾足夠，膚色唔均、少少泛紅同毛孔都有修飾到，但又唔會覺得塊面有一層好厚嘅粉。上妝後會有自然嘅光澤感，唔係嗰種好似出油咁嘅油光。由 Before & After 都可以睇到，原本面頰有少少泛紅、膚色不均勻同雀斑，上妝之後妝感好自然，膚色明顯均勻咗，雀斑等等瑕疵上一層就可以遮到70-80%。持妝度係今次試用入面最令我意外嘅地方。 呢幾日試用我都冇用 makeup base，返工由朝早一路帶妝到收工都有超過10個鐘。期間有出街、出汗同出油，但收工嗰陣除咗鼻翼兩邊有少少脫妝之外，其他位置都仲保持得幾完整，亦冇見到好明顯嘅斑駁或者氧化。而且我覺得佢出油之後反而幾自然，好似同原本嘅底妝融合咗，光澤感會再明顯少少，有種越夜越靚嘅感覺！

保濕度對我嚟講都岩岩好，唔會滋潤到覺得笠，但又唔會乾。尤其返工成日留喺冷氣地方，帶足全日妝都冇覺得塊面乾。

另外一點我幾欣賞就係佢同碎粉幾夾。平時夏天用氣墊之後再上碎粉定妝，最怕出街出汗，底妝就開始打交變到一撻撻。但今次用呢款再加碎粉，出汗出油之後都冇出現呢個情況，呢點對夏天底妝嚟講我覺得幾加分。

整體用落，我覺得呢款比較適合鍾意有光澤感、遮瑕度夠，但又唔想個底妝太厚嘅人。以我自己嚟講，最意外都係持妝力，因為最近香港咁熱，我本身以為呢種偏保濕、有光澤感嘅氣墊持妝力一般，但實際返工帶妝10個鐘左右都仲keep到，表現比我平時用開嘅氣墊好幾多，都幾推薦！