M.A.C

亮肌輕透精華氣墊粉底 #鎖光小金盒

比預期有驚喜嘅cushion～
試用咗5日，嘗試配唔同底霜同碎粉、粉餅，整體都幾百搭。
以呢個輕薄度，遮瑕力算好強，印一下就覆蓋到毛孔，面部其他小瑕疵都遮到，不過遮黑眼圈比較遜色。
面中做到12小時持妝，唔甩唔溶，下午出咗少少油，反而有奶油肌嘅效果，妝感更加靚。可以用紙巾輕輕印走表面嘅油，之後用掃以按壓方式補少少碎粉，已經可以變返好似啱啱化好妝時嘅效果。

雖然佢遮蓋毛孔幾強，但冇溶入毛孔，卸妝清潔都相對容易，一洗就甩。
乾肌嚟講算中度保濕，面頰、下巴、表情位置幾小時內都無法避免會出現乾紋。下巴位郁動多而且比較乾，會出現甩妝情況。估計沙漠肌、重油肌都唔太啱用。乾肌如果加重保濕型底霜或防曬打底，持妝感會更好。

另外一樣impressive嘅係持妝超過12小時後，竟然一啲都冇暗沉。16小時後再抹一撻新嘅粉底上面，接近零色差。因為物流送貨遲咗，冇辦法試足7日，試用嘅6日當中，5日喺強冷氣Office度過，只有1日喺日常去街行商場行室外。可能因為而家天氣潮濕，乾感冇咁強烈，甩妝情況亦冇咁嚴重，都比較防水，出咗少少汗都完全冇溶妝。

另外講講工具～
本身盒內配嘅粉撲，形狀好特別，好適合拍細緻位，不過物料好吸粉。輕拍落cushion後反轉，肉眼可見原本濕嘅粉撲面，瞬間俾撲芯吸收哂啲粉。睇圖，係化完其中一日後，用力印落紙巾印吸反出嚟嘅粉，份量多到夠印多半塊面。我半塊面要攞一次粉，對比其他撲，印一次可以鋪勻成塊面，就有啲浪費，而且粉撲質感偏硬同薄，拍起嚟比較吃力，回彈力唔夠。呢度有啲扣分。
第6日換咗自己買嘅其他牌子棉花糖粉撲，其實拍出黎嘅妝效冇太大分別，一樣好貼服遮瑕遮毛孔，但所需時間同力就少咗好多，而且印落紙巾都少好多殘留，即冇咁浪費。一盒只有12g，如果俾撲食咗1/2-1/3就太唔抵喇～

整體算係近年試過嘅cushion當中最滿意，而且本來我唔係揀NC10色，因呢隻色唔係選擇行列當中，但誤打誤撞Cosme寄咗呢個色俾我，反而更加適合我嘅膚色。係會想回購嘅cushion❤️，有啲期待秋冬天再試下佢嘅保濕力 。