CANMAKE TOKYO

花漾瑰麗胭脂

質感
粉質超級幼細，摸落去有種「粉粉濕潤」嘅感覺，唔會乾爭爭。呢盤 #17 係「草莓牛奶色」，帶有精緻嘅珍珠粒子，望落係粉嫩嘅冷調粉紅，但上面後唔會太誇張。佢一盒入面有齊透亮光澤同柔霧兩種妝效，可以自己 mix 埋用，變化好靈活。

使用感
呢盒胭脂上面後效果好自然，就算肉眼睇覺得偏冷調、似 Barbie pink，掃上塊面之後完全唔會太 sharp，反而係好輕透嘅粉嫩感，望落個人即刻有氣色又唔會 over。粉質好貼膚，唔會起粉樣，仲自帶珠光粉末，日常妝連 highlight 都可以慳返。附送嘅胭脂掃細細把，旅行帶出去好方便，不過要注意第一下上色可能會比較深，建議先用點壓手法或者改用自己嘅胭脂掃會更均勻。

持久度
持久度算中規中矩，朝早化好妝，正常返工或者出街大半日都仲 keep 到六七成左右。如果夏天出汗多或者長時間戴口罩，大約三四個鐘後會有少少褪色，不過補妝好方便，細細盒擺喺手袋就得。

性價比
Canmake 不嬲都係平民恩物，呢盒一百蚊有找，仲要一盒有齊五格顏色，可以分開用又可以混埋一齊掃，玩味十足。粉質同妝效絕對對得住價錢，仲自帶掃同鏡子，出街補妝極方便。如果你想試下一盒多用嘅胭脂，又想要自然粉嫩好氣色，#17 呢個草莓牛奶色真心抵玩！