CANMAKE TOKYO

多用途眼影底膏

Canmake呢支Lasting Multi Eyebase WP眼影底霜真係開架彩妝入面嘅好物✨尤其是對付香港呢啲又濕又熱嘅天氣，佢對油眼皮好有幫助！

佢包裝細細支好似唇蜜咁，擠出嚟係白色乳霜狀，質地雖然有少少杰身，但只要用手指公輕輕喺眼皮上面推開就會變成透明啞光

講到實際用落個眼妝度個效果真係勁明顯，就算本身係啲顯色度麻麻地嘅眼影，疊喺佢上面之後啲色都會即刻變得飽和咗，大粒閃粉嘅附著力都好咗唔少

最令我驚艷嘅係佢個持妝同埋抗積線能力，平時到咗下晝眼皮摺位通常都會積咗一條粉痕，用咗呢支打底之後，可以由朝到晚keep住個眼妝乾淨，就算出油出汗，啲眼影都keep到

加上佢寫話係Multi，就係連眉毛都用得，如果眉好容易甩色，畫眉之前先用佢打個底，條眉持久度更加耐，可以近乎一整日唔甩。以佢幾十蚊嘅價錢可以有呢個效果，性價比都幾高

推薦俾眼皮容易出油積線、內雙，或者係想眼妝keep到全日嘅人。

顯色度：⭐️⭐️⭐️⭐️
持妝力：⭐️⭐️⭐️⭐️
價錢：⭐️⭐️⭐️⭐️⭐️
推薦度：⭐️⭐️⭐️⭐️（油眼救星）